21 жніўня, Мінск /Кар. БЕЛТА/. У Мінску да новага навучальнага года распрацавалі адзінае для ўсіх школ двухтыднёвае меню. Аб гэтым паведаміла сёння журналістам намеснік начальніка аддзела грамадскага харчавання галоўнага ўпраўлення спажывецкага рынку Мінгарвыканкама Марына Дзякава, перадае карэспандэнт БЕЛТА.
"Рацыёны распрацаваны дыферэнцыравана па ўзросце вучняў - 6-10, 11-13 і 14-17 гадоў", - сказала Марына Дзякава.
Паводле яе слоў, пры складанні меню ўлічаны патрабаванні і пастановы асноўных санітарных норм і правілаў для арганізацыі харчавання ва ўстановах агульнай сярэдняй адукацыі.
"У частцы захавання сезоннасці, рацыянальнага размеркавання агульнай каларыйнасці сутачнага рацыёну, аптымальных суадносін харчовых рэчываў (бялкоў, тлушчу, вугляводаў), выкарыстання прадуктаў, дазволеных для харчавання дзяцей, выключана паўтарэнне аднайменных страў на працягу двух дзён запар", - звярнула ўвагу намеснік начальніка аддзела.
Харчаванне вучняў у сталіцы арганізуюць дзевяць раённых камбінатаў школьнага харчавання. Яны абслугоўваюць 251 аб'ект пры ўстановах агульнай сярэдняй адукацыі.
"Харчаванне вучняў арганізоўваецца як за кошт бюджэтных сродкаў, так і за кошт сродкаў бацькоў. Вучні першых-чацвёртых класаў атрымліваюць за кошт бюджэтных сродкаў гарачыя сняданкі, вучні з малазабяспечаных, няўдалых і іншых ільготных катэгорый - адна-, двух- і трохразовае бясплатнае харчаванне. Вучні пятых-адзінаццатых класаў атрымліваюць аднаразовае гарачае харчаванне за кошт сродкаў бацькоў", - растлумачыла Марына Дзякава.-0-
