17 лістапада, Масква /Эдуард Півавар - БЕЛТА/. У Еўразійскім эканамічным саюзе з 1 студзеня 2015 года будзе забаронена гандляваць "лейкозным" малаком, паведамілі БЕЛТА ў прэс-службе Еўразійскай эканамічнай камісіі.
"Тэхнічны рэгламент Мытнага саюза "Аб бяспецы харчовай прадукцыі", які змяшчае ў тым ліку патрабаванні да сырога малака, прыняты рашэннем Камісіі Мытнага саюза ў снежні 2011 года. Трэба падкрэсліць, што названы тэхнічны рэгламент уступіў у сілу ў ліпені 2013 года. З 1 студзеня 2016 года патрабаванні тэхрэгламенту аб бяспецы харчовай прадукцыі МС, якія забараняюць гандаль "лейкозным" малаком, у краінах ЕАЭС стануць абавязковымі", - гаворыцца ў каментарыі прэс-службы ЕЭК.
У адпаведнасці з гэтым дакументам да абарачэння ў саюзе дапускаецца сырое малако, атрыманае толькі ад здаровых кароў. Прычым з гаспадарак, дзе няма заразных захворванняў жывёл. Сярод такіх захворванняў названы і лейкоз. Ён трапіў у тэхнічны рэгламент Мытнага саюза ў адным спісе з небяспечнымі хваробамі: яшчурам, чумой, бруцэлёзам.
Такое абмежаванне дзейнічае ў многіх дзяржавах, напрыклад, у краінах Еўрасаюза.
"Вытворцам малака і малочных прадуктаў дзяржаў саюза было прадастаўлена дастаткова часу для падрыхтоўкі да работы ў новых умовах: змянення тэхналогій, правядзення неабходных прафілактычных мерапрыемстваў і г.д., - падкрэсліваецца ў каментарыі. - Акрамя таго, многія вядучыя вытворцы прымалі ўдзел у распрацоўцы як тэхнічнага рэгламенту "Аб бяспецы харчовай прадукцыі", так потым і тэхрэгламенту саюза "Аб бяспецы малака і малочнай прадукцыі". Такім чынам, прадстаўнікі вядучых малочных кампаній дэ-факта з'яўляюцца сураспрацоўшчыкамі ключавых дакументаў, што рэгулююць пытанні бяспекі прадукцыі ў гэтай сферы".
У ЕЭК таксама адзначылі, што да 31 снежня 2015 года ў ЕАЭС дапускаюцца вытворчасць і выпуск малака і малочнай прадукцыі ў адпаведнасці з нацыянальнымі, прынятымі да "харчовага" тэхрэгламенту, нарматыўнымі прававымі актамі. Гэта значыць пераходны перыяд, які дае магчымасць бізнесу падрыхтавацца да работы па новых патрабаваннях, склаў чатыры гады.-0-
