2 кастрычніка, Мінск /Юлія Дылянок - БЕЛТА/. Сістэма жыллёва-камунальнай гаспадаркі Беларусі гатова да ацяпляльнага сезона ў поўным аб'ёме, паведаміў сёння журналістам начальнік аддзела па рабоце са зваротамі грамадзян і сродкаў масавай інфармацыі Мінжылкамгаса Генадзь Аксціловіч, перадае карэспандэнт БЕЛТА.
"У рамках выканання ў тым ліку даручэння ўрада да ацяпляльнага сезона-2017 сістэма жыллёва-камунальнай гаспадаркі гатова ў поўным аб'ёме", - адзначыў Генадзь Аксціловіч.
Ён канстатаваў, што падрыхтоўка да асенне-зімовага сезона складаецца з некалькіх мерапрыемстваў, якія даюць магчымасць забяспечыць насельніцтва якаснай паслугай цеплазабеспячэння.
Па стане на 27 верасня завершаны работы па 45 паказчыках, у тым ліку капітальным рамонце катлоў і замене неэканамічных катлоў, прафілактычным рамонце сістэм ацяплення і цеплавых пунктаў, якія знаходзяцца на абслугоўванні арганізацый ЖКГ, рамонце стыкаў сценавых панэлей і дахаў.
У адпаведнасці з даручэннем урада арганізацыям ЖКГ у 2017 годзе неабходна замяніць 652 км цеплавых сетак. "Ужо заменена 544 км цеплавых сетак у аднатрубным выкананні, у тым ліку з выкарыстаннем пі-труб - 528 км. Да канца года заданне будзе выканана", - сказаў Генадзь Аксціловіч.
Паводле яго слоў, у цэлым па галіне створаны запас 11,7 тыс. т топачнага мазуту, або 108 працэнтаў ад задання, у тым ліку ў якасці рэзервовага паліва для газавых кацельняў - 11,4 тыс. т (109 працэнтаў). Поўнасцю выканана заданне па стварэнні запасу драўнянага паліва.
"Атрымана 254 пашпарты гатоўнасці спажыўцоў цеплавой энергіі, якія знаходзяцца на абслугоўванні ЖКГ, 38 пашпартоў гатоўнасці арганізацый, што транспартуюць цеплаэнергію, і 3 тыс. 526 пашпартоў гатоўнасці цеплакрыніц, якія знаходзяцца на абслугоўванні ЖКГ. Усе - 100 працэнтаў. Што датычыцца жыллёвага фонду, то на сённяшні дзень пашпарты гатоўнасці атрымалі ўсе дамы", - рэзюмаваў Генадзь Аксціловіч.-0-
