21 сакавіка, Мінск /Аксана Каруна - БЕЛТА/. У Мінску адкрыццё сезона атракцыёнаў плануецца на 15 красавіка, паведаміў генеральны дырэктар камунальнага ўнітарнага прадпрыемства "Мінскзялёнбуд" Ігар Кушнярэвіч сёння на аператыўнай нарадзе ў Мінгарвыканкаме, перадае карэспандэнт БЕЛТА.
"У Мінску пачалася падрыхтоўка да эксплуатацыі атракцыёнаў. Згодна з планам мерапрыемстваў па раскансервацыі атракцыёнаў, выконваецца комплекс работ", - сказаў Ігар Кушнярэвіч.
Спецыялісты правяраюць металаканструкцыі на трываласць, праводзяць грузавыя выпрабаванні і электрафізічныя вымярэнні, удакладніў гендырэктар. У выпадку неабходнасці зношаныя дэталі, вузлы і механізмы будуць заменены. "Пры ўмове выканання норм бяспекі Дзяржпрамнагляд выдае дазволы на запуск атракцыёнаў", - адзначыў Ігар Кушнярэвіч.
На балансе КУП "Гарадскія паркі Мінскзялёнбуда" знаходзяцца чатыры сталічныя паркі - Горкага, Чалюскінцаў, 50-годдзя Кастрычніка і 900-годдзя Мінска. У іх эксплуатуюцца больш за 30 атракцыёнаў.-0-