25 кастрычніка, Мінск /Кар. БЕЛТА/. Савет Міністраў зацвердзіў міжведамасны план па рэалізацыі рэкамендацый, прынятых Беларуссю па выніках праходжання другога цыкла ўніверсальнага перыядычнага агляду ў Савеце ААН па правах чалавека, і рэкамендацый, адрасаваных Рэспубліцы Беларусь дагаворнымі органамі па правах чалавека, на 2016-2019 гады. Адпаведнае рашэнне замацавана пастановай Савета Міністраў нумар 860 ад 24 кастрычніка 2016 года, паведамілі БЕЛТА ў прэс-службе ўрада.
Міжведамасны план з'яўляецца праграмным дакументам і накіраваны на садзейнічанне выкананню Беларуссю ўзятых міжнародных абавязацельстваў у галіне правоў чалавека, уключаючы ўдасканаленне заканадаўства і правапрымяняльнай практыкі. Яго мэта - далейшае ўмацаванне нацыянальнага патэнцыялу ў ажыццяўленні міжнародных абавязацельстваў у галіне правоў чалавека.
Рэалізацыя міжведамаснага плана будзе садзейнічаць выкананню мерапрыемстваў дзяржпраграм, якія датычацца забеспячэння правоў беларускіх грамадзян, а таксама Рамачнай праграмы ААН па аказанні дапамогі Рэспубліцы Беларусь у мэтах развіцця на 2016-2020 гады, краінавых праграм ПРААН, ЮНІСЕФ і ЮНФПА для Беларусі на 2016-2020 гады.
Міжведамасны план таксама будзе садзейнічаць дасягненню мэт і задач міжнароднага парадку дня ў галіне развіцця на перыяд да 2030 года.
Згодна з пастановай, мерапрыемствы міжведамаснага плана будуць ажыццяўляцца рэспубліканскімі органамі дзяржкіравання, мясцовымі выканаўчымі і распарадчымі органамі з прыцягненнем навуковых і рэлігійных арганізацый, грамадскіх аб'яднанняў, фінансавага і тэхнічнага патэнцыялу міжнародных арганізацый.
Фінансаванне мерапрыемстваў будзе ажыццяўляцца ў межах сродкаў, прадугледжаных у рэспубліканскім і мясцовых бюджэтах, у бюджэце дзяржаўнага пазабюджэтнага фонду сацыяльнай абароны насельніцтва на адпаведныя мэты, а таксама іншых крыніц, не забароненых заканадаўствам.
Выканаўцам міжведамаснага плана неабходна штогод да 20 лютага года, што ідзе за справаздачным, прадстаўляць у Міністэрства замежных спраў інфармацыю аб ходзе выканання гэтага плана.
У сваю чаргу Міністэрству замежных спраў даручана забяспечыць каардынацыю работы і кантроль за ходам рэалізацыі плана, а таксама штогадова да 20 красавіка года, што ідзе за справаздачным, прадстаўляць інфармацыю аб яго выкананні ў Савет Міністраў.
Пастанова нумар 860 уступае ў сілу з дня яе прыняцця.-0-
