4 кастрычніка, Мінск /Кар. БЕЛТА/. Магчымасць з'яўлення кола агляду ў раёне плошчы Свабоды будзе разгледжана камітэтам архітэктуры Мінгарвыканкама. Такая інфармацыя з'явілася сёння ў афіцыйным твітар-акаўнце адміністрацыі Цэнтральнага раёна Мінска, паведамляе БЕЛТА.
"Звярнуліся з прапановай устаноўкі ў раёне пл. Свабоды кола агляду. Вырашылі прапрацаваць пытанне з камітэтам архітэктуры Мінгарвыканкама", - гаворыцца ў тэксце паведамлення.
Цяпер кіраўнік адміністрацыі Ігар Бузоўскі вядзе асабісты прыём грамадзян. Названая прапанова паступіла сярод іншых зваротаў. Таксама ў афіцыйным акаўнце паведамляецца аб мерах, якія будуць прыняты па пытанні прадастаўлення жылля жыхарам дома па вул. Аршанская, 22, які згарэў.-0-