27 кастрычніка, Мінск /Кар. БЕЛТА/. Дажджы і мокры снег чакаюцца ў Беларусі ў выхадныя, паведаміла карэспандэнту БЕЛТА галоўны сіноптык службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Святлана Рыбакова.
"На гэтым тыдні зіма нагадала пра сябе, і хоць на большай частцы краіны ападкі прайшлі ў выглядзе дажджу, на ўсходзе Беларусі выпаў першы снег і ўстанавілася снежнае покрыва. Так, на раніцу 27 кастрычніка па ўсходзе Гомельскай, Магілёўскай, Віцебскай абласцей вышыня снегу дасягае 1-8 см, у Мсціслаўскім раёне - да 14 см", - адзначыла сіноптык.
Святлана Рыбакова расказала, што ў бліжэйшыя дні зноў чакаецца пагаршэнне ўмоў надвор'я. У ноч на 28 кастрычніка надвор'е на тэрыторыі Беларусі яшчэ будзе вызначаць вобласць павышанага атмасфернага ціску: будзе пераважна без ападкаў, у многіх раёнах чакаецца туман, слабы галалёд, на асобных участках дарог - галалёдзіца. Але ўжо днём у пятніцу тэрыторыя краіны зноў будзе знаходзіцца пад уплывам атмасферных франтоў, якія змяшчаюцца з Заходняй Еўропы, таму на большай частцы тэрыторыі пройдуць ападкі ў выглядзе дажджу і мокрага снегу, вецер будзе паўднёва-заходні парывісты, у асобных раёнах - моцны парывісты. Тэмпература паветра ноччу складзе ад мінус 3 да плюс 3 градусаў, днём будзе 1-7 градусаў цяпла, па захадзе паветра прагрэецца да плюс 9 градусаў.
У гэтыя выхадныя чакаецца няўстойлівае ветранае з ападкамі надвор'е. У суботу захаваецца ўплыў атмасферных франтоў і няўстойлівых паветраных мас, што паступаюць з Балтыйскага мора. На большай частцы тэрыторыі краіны чакаюцца дажджы, ноччу па ўсходзе пройдзе мокры снег, магчымы слабы галалёд. Вецер будзе паўночна-заходні парывісты. Тэмпература паветра ноччу будзе вагацца ад нуля па ўсходзе да плюс 6 градусаў па захадзе, днём яна складзе 2-8 градусаў цяпла. У нядзелю ўмовы надвор'я на тэрыторыі Беларусі будуць вызначаць франтальныя раздзелы ад цыклону з цэнтрам над Варонежскай вобласцю. У многіх раёнах пройдуць дажджы, па паўночным усходзе - з мокрым снегам. Ноччу і раніцай у асобных раёнах чакаецца слабы галалёд, на дарогах - галалёдзіца. Тэмпература паветра ноччу складзе ад мінус 2 да плюс 4 градусаў, днём будзе ад нуля да плюс 7 градусаў.
Няўстойлівае надвор'е захаваецца і ў пачатку наступнага тыдня, а тэмпературны фон яшчэ панізіцца. У панядзелак, 31 кастрычніка, на большай частцы тэрыторыі Беларусі чакаюцца кароткачасовыя ападкі, у асноўным, мокры снег. Ноччу і раніцай у асобных раёнах магчымы слабы галалёд, на дарогах - галалёдзіца. Тэмпература паветра ноччу складзе ад мінус 4 да плюс 3 градусаў, днём будзе ад мінус 1 да плюс 6 градусаў. У аўторак па ўсходзе краіны, а днём і ў паўночна-заходніх раёнах чакаюцца ападкі, у асноўным снег і мокры снег. Ноччу і раніцай у асобных раёнах прагназуецца слабы галалёд, на дарогах - галалёдзіца. Тэмпература паветра ноччу панізіцца да мінус 1 - мінус 6 градусаў, днём яна складзе ад мінус 2 да плюс 3 градусаў.-0-
