12 лютага, Мінск /Кар. БЕЛТА/. Давер беларусаў да ўлады на стабільна высокім узроўні. Аб гэтым паведаміў дырэктар Інстытута сацыялогіі НАН Беларусі Ігар Катляроў у эфіры тэлеканала "Беларусь 1", паведамляе БЕЛТА.
Сацыялагічныя даследаванні праводзяцца ў Беларусі на рэгулярнай аснове. Гаворачы аб іх выніках, Ігар Катляроў адзначыў: "Давер да ўлады з боку беларусаў стабільна на даволі высокім узроўні. Самае галоўнае, што ўлада прымае тыя рашэнні, якія чакаюць людзі".
Напярэдадні выбараў у мясцовыя Саветы дэпутатаў, паводле слоў Ігара Катлярова, адна з праблем, што хвалююць насельніцтва, - недастатковая магчымасць правядзення вольнага часу, асабліва ў сельскай мясцовасці. Даследаванні таксама адзначаюць тэндэнцыю ўстаранення праблемы беспрацоўя.
Ігар Катляроў падкрэсліў важнасць работы дэпутатаў сельскіх саветаў. "Менавіта яны бліжэй за ўсіх знаходзяцца да людзей, і праз іх ідзе сігнал да вышэйшых органаў улады. Цікава, што там, дзе добра працавалі дэпутаты мясцовых Саветаў цяперашняга склікання, чакаецца высокая яўка выбаршчыкаў", - дадаў ён.-0-