3 кастрычніка, Мінск /Кар. БЕЛТА/. Чыноўнікі на месцах павінны бачыць кожнага чалавека і старацца яму дапамагчы, падкрэсліў у размове з карэспандэнтам БЕЛТА першы намеснік прэм'ер-міністра Аляксандр Турчын, які сёння правёў асабісты прыём грамадзян у Савеце Міністраў.
"Чыноўнікі на месцах павінны бачыць кожнага чалавека. Тут нельга фармальна падыходзіць, трэба ўнікаць у кожную канкрэтную жыццёвую сітуацыю і старацца дапамагчы чалавеку", - сказаў Аляксандр Турчын.
Сёння ў час прыёму грамадзян узнімаліся як прыватныя, так і агульныя пытанні. Напрыклад, была агучана ініцыятыва ад бізнес-сектара аб рэгуляванні тарыфаў на рыэлтарскія паслугі і стварэнні інфармацыйнага рэсурсу "Электронны рэестр дагавораў на аказанне рыэлтарскіх паслуг", узнімаліся пытанні выплаты мытных плацяжоў. "Такая зваротная сувязь заўсёды важна. Здавалася б, чалавек у час прыёму ўзнімае асабістае пытанне, але можа недзе неабходна ўдасканаліць заканадаўства, а можа, у тым, што здарылася, ёсць віна і суб'ектаў гаспадарання. У той ці іншай інтэрпрэтацыі такія пытанні перыядычна ўзнімаюцца. Наогул, тэмы цікавыя, некаторыя новыя, і яны ўсе ідуць у рэчышчы агульнай палітыкі дзяржавы па лічбавізацыі эканомікі, - адзначыў Аляксандр Турчын. - Адно з пытанняў, якія даволі часта ўзнікаюць у грамадзян - прадаўжэнне дагавораў арэнды зямельных участкаў. І мы ў Савеце па развіцці прадпрымальніцтва рэгулярна іх разглядаем. Нейкія рашэнні нам удалося знайсці сумесна з Дзяржаўным камітэтам па маёмасці. Але, на жаль, часам гэтыя сітуацыі заходзяць вельмі далёка. Здаецца, не вельмі вялікія памеры гэтых зямельных участкаў, і ў людзей маглі быць аб'ектыўныя прычыны, што перашкодзіла своечасова звярнуцца за прадаўжэннем дагавораў арэнды, але тым не менш закон ёсць закон".
Паводле слоў першага віцэ-прэм'ера, на такія прыёмы грамадзяне могуць прыходзіць абсалютна з любымі пытаннямі, якія іх хвалююць. Пры гэтым ён закрануў тэму "прафесійных скаржнікаў". "Як паказвае практыка, значную частку ад агульнай колькасці звернутых складаюць людзі, якія на працягу дзясяткаў гадоў прыходзяць да розных чыноўнікаў на прыём з аднымі і тымі ж пытаннямі. Яны пазбаўляюць іншых людзей магчымасці трапіць на прыём і агучыць сваю праблему", - заўважыў Аляксандр Турчын.-0-
