21 жніўня, Мінск /Кар. БЕЛТА/. Беларускія альпіністы пакарылі Казбек і разгарнулі на яго вяршыні дзяржаўны сцяг. Аб гэтым паведамілі карэспандэнту БЕЛТА ў Беларускай федэрацыі альпінізму.
Свой шлях больш як дваццаць беларускіх спартсменаў-аматараў пачалі 8 жніўня. Уся дарога заняла каля двух тыдняў, само ўзыходжанне на гару працягвалася тры дні. Як адзначылі ў Беларускай федэрацыі альпінізму, мерапрыемства адбылося дзякуючы запрашэнню ад улад Грузіі.
Вышыня Казбека складае 5033,8 м, асноўныя цяжкасці пры пакарэнні гары выклікаюць вялікая вышыня, крутыя схілы, а таксама зменлівае надвор'е і ледаспады. Ужо на вышыні 2,5 тыс. м колькасць кіслароду становіцца значна меншая, чым на зямлі, і альпіністы падвяргаюцца горнай хваробе. Вяршыня па складанасці ўзыходжання не ўступае знакамітаму Эльбрусу.-0-