25 сакавіка, Мінск /Кар. БЕЛТА/. Спікеры палат Нацыянальнага сходу Беларусі Наталля Качанава, Ігар Сергяенка, а таксама старшыня Палаты прадстаўнікоў чацвёртага, пятага, шостага і сёмага скліканняў Уладзімір Андрэйчанка разам прыехалі ў пасольства Расіі, каб пакінуць запісы ў кнізе спачуванняў у сувязі з гібеллю вялікай колькасці мірных грамадзян пры тэракце ў Падмаскоўі 22 сакавіка, перадае карэспандэнт БЕЛТА.
Спікер верхняй палаты беларускага парламента Наталля Качанава падкрэсліла, што члены Савета Рэспублікі з глыбокім болем успрынялі паведамленне аб жорсткім, крывавым тэрарыстычным акце.
Фота Паўла Арлоўскага
Спікер верхняй палаты беларускага парламента Наталля Качанава падкрэсліла, што члены Савета Рэспублікі з глыбокім болем успрынялі паведамленне аб жорсткім, крывавым тэрарыстычным акце.
"Гэта зверскае злачынства ўзрушыла і шакіравала ўсю Беларусь. Пачуцці, слёзы і горыч, якія перапаўняюць беларусаў, увасобіліся ў шматлікія спантанныя акцыі салідарнасці і сцены смутку, сардэчную падтрымку з усіх куткоў нашай краіны. Гэтаму жудаснаму злачынству супраць чалавечнасці няма і не можа быць ніякага апраўдання. Вінаватыя павінны панесці заслужанае пакаранне, - гаворыцца ў запісе, пакінутым у кнізе спачуванняў. - Смуткуем аб ахвярах тэракта і спадзяёмся на хутчэйшае выздараўленне пацярпелых. У гэты складаны час жадаем усім стойкасці духу, сіл і мужнасці. Беларусь разам з вамі!"
Шчырыя спачуванні родным і блізкім загінулых, пажаданні хутчэйшага выздараўлення пацярпелым адрасаваў старшыня Палаты прадстаўнікоў Нацыянальнага сходу Ігар Сергяенка.
"Беларускія дэпутаты, як і ўвесь народ Беларусі, з болем успрынялі паведамленне аб страшэнным тэракце ў канцэртнай зале "Крокус Сіці Хол" у Падмаскоўі, што прывёў да шматлікіх ахвяр, сярод якіх ёсць дзеці. У гэты складаны час разам з расіянамі нас перапаўняюць пачуцці смутку і жалю, - гаворыцца ў спачуванні. - Рашуча асуджаем забойства мірных грамадзян і заяўляем, што тэрарызму не можа быць ніякага апраўдання. Упэўнены, што ўсе адказныя за планаванне, арганізацыю і ажыццяўленне гэтага варварскага злачынства панясуць няўхільнае пакаранне".-0-
