18 верасня, Вена /Кар. БЕЛТА/. Беларусь і Еўрапейская камісія дамовіліся аб тэрмінах правядзення партнёрскай праверкі рэзультатаў стрэс-тэстаў АЭС каля Астраўца, перадае карэспандэнт БЕЛТА.
Сёння на пляцоўцы МАГАТЭ ў ходзе 61-й сесіі Генканферэнцыі прадстаўнікі беларускай дэлегацыі правялі сустрэчу з намеснікам генеральнага дырэктара па энергетыцы Еўрапейскай камісіі Герасімасам Томасам. Беларускі бок прадставілі намеснік міністра энергетыкі Міхаіл Міхадзюк, пасол Беларусі ў Аўстрыі, пастаянны прадстаўнік пры міжнародных арганізацыях у Вене Алена Купчына, начальнік Дзяржатамнагляду Вольга Лугаўская.
Бакі абмеркавалі тэрміны правядзення партнёрскай праверкі рэзультатаў стрэс-тэстаў Беларускай АЭС і практычныя механізмы рэалізацыі гэтай работы.
Стрэс-тэсты на Беларускай АЭС праведзены ў 2016 годзе па еўрапейскай методыцы, з улікам рэкамендацый, заснаваных на распрацаваных Еўракамісіяй і Еўрапейскай групай рэгулятараў ядзернай бяспекі спецыфікацыях. Яны заключаюцца ў праверцы экстрэмальных уздзеянняў і адаптацыі АЭС у выпадку надзвычайных сітуацый. У час стрэс-тэстаў праводзяцца работы па ацэнцы бяспекі АЭС пры ўзнікненні экстрэмальных знешніх уздзеянняў, прагназуюцца наступствы такіх прыродных фактараў, як спалучэнне затаплення, экстрэмальных умоў надвор'я і вонкавых уздзеянняў, наступствы страты функцый бяспекі, выкліканыя збоем электразабеспячэння АЭС. Беларусь па выніках стрэс-тэстаў рыхтуе нацыянальны даклад, ён будзе перакладзены на англійскую мову і перададзены Еўрапейскай камісіі.
Беларуская АЭС будуецца па тыпавым расійскім праекце АЭС-2006 новага пакалення "3+" паблізу Астраўца (Гродзенская вобласць). Першы энергаблок плануецца ўвесці ў эксплуатацыю ў 2019 годзе, другі - у 2020-м.-0-
