13 студзеня, Мінск /Уладзімір Мацвееў - БЕЛТА/. Справаздача SEED-місіі МАГАТЭ, якая наведае Беларусь 16-20 студзеня, будзе падрыхтавана не раней за сакавік. Аб гэтым сёння паведаміў журналістам начальнік упраўлення інфармацыі - прэс-сакратар МЗС Беларусі Дзмітрый Мірончык, перадае карэспандэнт БЕЛТА.
Паводле слоў прэс-сакратара, у сярэднім працэс падрыхтоўкі справаздачы па выніках работы місіі МАГАТЭ займае ад трох да шасці месяцаў, што абумоўлена працэдурай іх узгаднення ўнутры Агенцтва.
"Але ў гэтым канкрэтным выпадку мы дамовіліся з МАГАТЭ, што бакі прыкладуць намаганні, каб максімальна паскорыць гэты працэс. Гаварыць аб нейкіх канкрэтных тэрмінах на цяперашнім этапе рана, але пакуль мы арыентуемся, самае ранняе, на сакавік", - сказаў Дзмітрый Мірончык.-0-