7 верасня, Мінск /Кар. БЕЛТА/. У МЗС Беларусі 11 верасня адбудзецца брыфінг па тэматыцы падрыхтоўкі і правядзення беларуска-расійскіх вучэнняў "Захад-2017" для кіраўнікоў дыпламатычных прадстаўніцтваў замежных дзяржаў і міжнародных арганізацый, акрэдытаваных у краіне. Аб гэтым паведаміў на брыфінгу начальнік упраўлення інфармацыі - прэс-сакратар МЗС Беларусі Дзмітрый Мірончык, перадае карэспандэнт БЕЛТА.
Па стане на сённяшні дзень для ўдзелу ў брыфінгу зарэгістраваліся 47 прадстаўнікоў з 37 краін і міжнародных арганізацый.
У духу сваіх міжнародных абавязацельстваў і выканання дакладнай устаноўкі кіраўніка дзяржавы беларускі бок прадаўжае рабіць актыўныя крокі па забеспячэнні транспарэнтнасці маючых адбыцца сумесных стратэгічных вучэнняў узброеных сіл Беларусі і Расіі "Захад-2017", якія адбудуцца 14-20 верасня.
"Як вы ведаеце, яшчэ ў ліпені на форуме АБСЕ па супрацоўніцтве ў галіне бяспекі ў Вене Беларуссю быў праведзены брыфінг, на якім дзяржавам-удзельніцам была прадстаўлена падрабязная інфармацыя аб задуме, сцэнарыі, асноўных мэтах і задачах вучэнняў, а таксама аб месцах іх правядзення, сілах і сродках, якія будуць задзейнічаны, - адзначыў афіцыйны прадстаўнік беларускага МЗС. - 2 жніўня 2017 года мы накіравалі краінам - удзельніцам АБСЕ ўсю неабходную інфармацыю аб вучэннях. Гэта таксама было зроблена ў строгай адпаведнасці з палажэннямі Венскага дакумента 2011 года аб мерах умацавання даверу і бяспекі (г. зн. не пазней за 42 дні да пачатку вучэнняў). Беларускі бок накіраваў запрашэнні для назірання Латвіі, Літве, Польшчы, Украіне, Эстоніі, Швецыі і Нарвегіі. Запрашэнне атрымалі прадстаўнікі ваенна-дыпламатычнага корпуса замежных краін, акрэдытаваныя пры пасольствах сваіх дзяржаў у Беларусі".
Дзмітрый Мірончык адзначыў, што, хоць Венскі дакумент наогул не прадугледжвае запрашэння на вучэнні міжнародных арганізацый, у Беларусь у духу добрай волі запрасілі для назірання за актыўнай фазай вучэнняў "Захад-2017" прадстаўнікоў ААН, АБСЕ, НАТА і іншых міжнародных структур.
Акрамя таго, ён звярнуў увагу, што зацікаўленым замежным журналістам яшчэ ў ліпені было прапанавана накіроўваць заяўкі на акрэдытацыю. Гэта прадугледжана Венскім дакументам.
"Цяпер намі апрацоўваецца беспрэцэдэнтная колькасць зваротаў замежных СМІ з просьбай аб акрэдытацыі - каля 270. Заяўкі атрыманы ад інфармагенцтваў, выданняў і тэлеканалаў з усіх краін-суседак, а таксама Вялікабрытаніі, Германіі, Даніі, Канады, Нідэрландаў, Нарвегіі, ЗША, Турцыі, Фінляндыі, Францыі, Швецыі. Вучэнні будуць асвятляць таксама журналісты з Катара, Рэспублікі Карэя, Японіі, - сказаў Дзмітрый Мірончык. - Паводле нашай інфармацыі, цяпер арганізатарамі завяршаецца падрыхтоўка праграмы для журналістаў. Нашы калегі з Міністэрства абароны пры садзейнічанні МЗС пастараюцца максімальна дапамагчы ім у выкананні прафесійных абавязкаў, уключаючы арганізацыю рэгулярных брыфінгаў, рассылку прэс-рэлізаў, раздачу відэаматэрыялаў, арганізацыю трансляцый".
Падводзячы вынік, афіцыйны прадстаўнік МЗС падкрэсліў: "Беларускі бок, як ніхто іншы, зацікаўлены ва ўмацаванні бяспекі і ваенна-палітычнай стабільнасці ў рэгіёне. Беларусь строга, да літары, выконвае свае міжнародна-прававыя абавязацельствы і дзейнічае ў духу Венскага дакумента нават там і тады, калі ў нас няма фармальных абавязацельстваў перад суседзямі і партнёрамі".-0-
