20 чэрвеня, Масква /Эдуард Півавар - БЕЛТА/. Кіраўнікі знешнепалітычных ведамстваў краін - удзельніц АДКБ разгледзяць праект стратэгіі калектыўнай бяспекі да 2025 года. Дакумент стане прадметам абмеркавання на пасяджэнні Савета міністраў замежных спраў АДКБ, якое пройдзе ў Ерэване 4 ліпеня, паведаміў БЕЛТА прэс-сакратар АДКБ Уладзімір Зайнетдзінаў.
"Будуць абмяркоўвацца актуальныя праблемы міжнароднай і рэгіянальнай бяспекі, тэндэнцыі развіцця абстаноўкі ў Сірыі і іншых зонах узброеных канфліктаў, узаемадзеянне дзяржаў - членаў АДКБ на міжнароднай арэне ў існуючай сітуацыі ў свеце, - адзначыў прэс-сакратар. - Міністры замежных спраў разгледзяць праект стратэгіі калектыўнай бяспекі Арганізацыі Дагавора аб калектыўнай бяспецы на перыяд да 2025 года і знешнепалітычныя аспекты процідзеяння міжнароднаму тэрарызму і экстрэмізму".
Чакаецца таксама, што ў час мерапрыемства будуць падпісаны рашэнні, якія датычацца актуалізацыі калектыўных указанняў пастаянным прадстаўнікам дзяржаў - членаў АДКБ і плана кансультацый прадстаўнікоў дзяржаў - членаў АДКБ па пытаннях знешняй палітыкі, бяспекі і абароны на другое паўгоддзе 2016 года - першае паўгоддзе 2017 года.
Акрамя таго, намечана разгледзець ход выканання рашэння Савета калектыўнай бяспекі АДКБ аб ратацыі службовых асоб пастаянна дзеючых рабочых органаў АДКБ.-0-
