27 красавіка, Мінск /Кар. БЕЛТА/. Беларусь зацікаўлена ў паспяховым узаемадзеянні з усходнімі і заходнімі суседзямі як унутры ЕАЭС, так і з ЕС. Аб гэтым заявіў пастаянны прадстаўнік Беларусі пры міжнародных арганізацыях у Жэневе Юрый Амбразевіч у час 67-й сесіі Еўрапейскай эканамічнай камісіі (ЕЭК) ААН, паведамілі БЕЛТА ў прэс-службе МЗС.
Кіраўнік беларускай дэлегацыі прадставіў стратэгічнае бачанне Беларуссю ўкладу, месца і ролі ЕЭК ААН у забеспячэнне эканамічнай інтэграцыі і супрацоўніцтва ў пан'еўрапейскім рэгіёне на перыяд да 2030 года.
Пастаянны прадстаўнік Беларусі нагадаў, што адным з ключавых вынікаў праведзенай у Мінску ў 2016 годзе міжнароднай канферэнцыі "Закладваючы асновы для эканамічнай інтэграцыі і ўстойлівага развіцця ў рэгіёне ЕЭК ААН. Бачанне да 2030 года" з'яўляецца ўзрастаючае разуменне таго, што еўрапейскаму рэгіёну трэба звярнуць асобную ўвагу на ўзаемадзеянне паміж інтэграцыйнымі эканамічнымі ўтварэннямі. Юрый Амбразевіч заклікаў ЕЭК ААН унесці ўклад ва ўсведамленне таго, што інтэграцыйныя працэсы павінны пазбягаць непатрэбнага і небяспечнага проціборства, імкнуцца да сумяшчальнасці і ўзаемадапаўняльнасці. "Беларусь зацікаўлена ў паспяховым узаемадзеянні з усходнімі і заходнімі суседзямі як унутры ЕАЭС, так і з ЕС", - заявіў дыпламат.
Юрый Амбразевіч запрасіў усе зацікаўленыя краіны да ўдзелу ў міжнароднай канферэнцыі па тэматыцы ўзаемасувязей і сумяшчальнасці ў рэгіёне Цэнтральнаеўрапейскай ініцыятывы, якая пройдзе ў Мінску ў чэрвені 2017 года.
Кіраўнік беларускай дэлегацыі выказаў упэўненасць, што ідэя аб фарміраванні глабальнай платформы абмеркавання працэсаў узаемадзеяння паміж рэгіянальнымі інтэграцыйнымі ўтварэннямі, выказаная Прэзідэнтам Беларусі з трыбуны саміту ААН у Нью-Ёрку ў 2015 годзе, атрымае ў бліжэйшы час сваё практычнае афармленне ў выглядзе канкрэтнага міжнароднага мерапрыемства. ЕЭК ААН запрошана выступіць адным з яго суарганізатараў.-0-
