30 верасня, Мінск /Кар. БЕЛТА/. Намеснік старшыні Палаты прадстаўнікоў, кіраўнік дэлегацыі Нацыянальнага сходу Беларусі Віктар Гумінскі на асеннім пасяджэнні Парламенцкай асамблеі АБСЕ, якое праходзіць у Скоп'і (Македонія), заклікаў не дапускаць фарміравання раздзяляльных ліній і росту напружанасці ў рэгіёне. Аб гэтым паведамілі БЕЛТА ў прэс-службе Палаты прадстаўнікоў.
На парламенцкай канферэнцыі, якая праходзіць у рамках асенняга пасяджэння ПА АБСЕ, Віктар Гумінскі прыняў удзел у дэбатах па тэме "Эфектыўнае кіраванне ў якасці асновы для стымулявання эканамічнага развіцця ў рэгіёне АБСЕ". "У сваім выступленні ён заклікаў да пабудовы справядлівай, прадказальнай і надзейнай гандлёва-эканамічнай архітэктуры на еўраатлантычнай і еўразійскай прасторы, якая павінна ўлічваць інтарэсы ўсіх краін, вызначаць правілы ўзаемавыгаднага супрацоўніцтва інтэграцыйных аб'яднанняў, дазваляць вырашаць узнікаючыя рознагалоссі мірным шляхам, не дапускаючы фарміравання раздзяляльных ліній, росту напружанасці і крызісу даверу паміж дзяржавамі", - праінфармавалі ў прэс-службе.
Віцэ-спікер таксама сустрэўся з генеральным сакратаром ПА АБСЕ Раберта Мантэла. На сустрэчы абмяркоўваліся вынікі выбараў дэпутатаў Палаты прадстаўнікоў шостага склікання і ўдзел місіі кароткатэрміновых наглядальнікаў ад Парламенцкай асамблеі АБСЕ ў міжнародным назіранні за імі. Акрамя таго, ішла размова аб удзеле беларускіх парламентарыяў у мерапрыемствах асамблеі і ўзаемадзеянні парламента з міжнародным сакратарыятам ПА АБСЕ.-0-
