14 верасня, Мінск /Кар. БЕЛТА/. Міністр замежных спраў Беларусі Уладзімір Макей правёў сустрэчу з дэлегацыяй Еўрапейскага банка рэканструкцыі і развіцця (ЕБРР) на чале з прэзідэнтам ЕБРР Сумам Чакрабарці. Аб гэтым БЕЛТА паведамілі ў прэс-службе МЗС Беларусі.
"Закранаючы напрамкі далейшага развіцця супрацоўніцтва, бакі сышліся на думцы аб магчымасці пашырэння аперацый банка ў Беларусі як за кошт новых напрамкаў і фарматаў сумеснай работы, так і шляхам нарошчвання аб'ёмаў фінансавання па ўжо існуючых праектах", - праінфармавалі ў знешнепалітычным ведамстве.
Бакі абмеркавалі бягучы стан узаемадзеяння паміж Беларуссю і ЕБРР, рэалізацыю сумесных праектаў у банкаўскім сектары, сферы камунальнай і транспартнай інфраструктуры, аднаўляльнай энергетыкі, прыватызацыі.
Бягучы візіт прэзідэнта ЕБРР у Беларусь другі па ліку. Першы адбыўся ў 2015 годзе, у час якога прайшлі сустрэчы з кіраўніцтвам урада, Нацбанка, Мінэканомікі, Мінфіна, падпісана некалькі дакументаў, накіраваных на пашырэнне магчымасцей для крэдытавання малога і сярэдняга бізнесу ў нацыянальнай валюце, прыцягненне стратэгічных інвестараў на прадпрыемствы дзяржаўнага сектара эканомікі.-0-
