27 мая, Мінск /Кар. БЕЛТА/. Пастаянны прадстаўнік Беларусі пры ААН Андрэй Дапкюнас 26 мая на спецыяльным пасяджэнні Эканамічнага і сацыяльнага савета ААН (ЭКАСАС) заклікаў больш задзейнічаць у глабальным развіцці патэнцыял краін з сярэднім узроўнем даходу. Аб гэтым БЕЛТА паведамілі ў прэс-службе МЗС Беларусі.
Андрэй Дапкюнас прадставіў бачанне месца і ролі гэтай катэгорыі дзяржаў у дасягненні глабальнага ўстойлівага развіцця. "На думку дыпламата, ААН павінна ў значна большай ступені, чым сёння, быць гатова задзейнічаць патэнцыял краін з сярэднім узроўнем даходу ў глабальным развіцці. Для гэтага неабходны асобны скаардынаваны механізм узаемадзеяння ўсіх элементаў сістэмы ААН, які садзейнічаў бы як аказанню краінам з сярэднім даходам міжнароднага садзейнічання, так і прыцягненню іх вопыту для патрэб глабальнага ўстойлівага развіцця", - растлумачылі ў прэс-службе.
На прыкладзе вопыту Беларусі Андрэй Дапкюнас адзначыў, што далейшы прагрэс менавіта ў краінах з сярэднім узроўнем даходу пакажа, наколькі паспяховым будзе выкананне прынятага на саміце ААН у мінулым годзе парадку дня ўстойлівага развіцця.
Спецыяльнае пасяджэнне ЭКАСАС адбылося ў штаб-кватэры ААН у Нью-Ёрку. Яно прысвячалася ўзаемадзеянню сістэмы ААН з краінамі з сярэднім узроўнем даходу. Мерапрыемства прайшло ў мэтах выканання рэзалюцыі Генеральнай асамблеі ААН па такіх дзяржавах, у распрацоўцы якой Беларусь прымала актыўны ўдзел.
У адпаведнасці з класіфікацыяй Сусветнага банка, да катэгорыі краін з сярэднім узроўнем даходу адносяцца больш за сто краін свету. Беларусь уваходзіць у верхнюю, найбольш развітую катэгорыю. У гэтых краінах пражывае большасць насельніцтва планеты. Паводле міжнародных ацэнак, на долю краін з сярэднім узроўнем даходу прыпадае больш за трэць сусветнага ВУП, чвэрць сусветнага экспарту і імпарту.
Беларусь актыўна адстойвае на міжнароднай арэне інтарэсы краін з сярэднім узроўнем даходу. У сакавіку 2016 года па ініцыятыве Беларусі і шэрага іншых краін у ААН была створана нефармальная група дзяржаў - актыўных прыхільніц пашырэння ў ААН інтарэсаў гэтай катэгорыі краін. На працягу некалькіх гадоў у Мінску адбыліся дзве рэгіянальныя канферэнцыі па розных аспектах устойлівага развіцця ў такіх дзяржавах.-0-
