26 жніўня, Мінск /Кар. БЕЛТА/. Беларусь з'яўляецца добрым суседам Украіны. Аб гэтым заявіла сёння журналістам прадстаўнік Кіева ў гуманітарнай падгрупе трохбаковай кантактнай групы па ўрэгуляванні крызісу ва Украіне, першы віцэ-спікер Вярхоўнай рады Ірына Герашчанка, перадае карэспандэнт БЕЛТА.
"Мы хочам шчыра падзякаваць Рэспубліцы Беларусь, якая з'яўляецца нашым добрым суседам, якая падтрымлівае тэрытарыяльную цэласнасць і незалежнасць Украіны, за стварэнне нейтральнай пляцоўкі, дзе абмяркоўваюцца важныя пытанні мірнага ўрэгулявання сітуацыі ў Данбасе", - сказала Ірына Герашчанка.
Першы віцэ-спікер заўважыла, што беларускі бок праяўляе сапраўдны клопат да ўкраінскага боку, арганізоўваючы перагаворы ў Мінску.
Разам з тым Ірына Герашчанка расказала, што за месяцы перагавораў яшчэ не паспела азнаёміцца са сталіцай Беларусі, хоць некаторыя з яе калег ужо наведвалі і тэатры, і музеі.
"Як толькі рушым наперад па тых пытаннях, якімі мы абавязаны займацца, мы прысвецім час таму, каб азнаёміцца з Мінскам", - рэзюмавала яна.-0-
