24 мая, Мінск /Кар. БЕЛТА/. У штаб-кватэры ААН у Нью-Ёрку намеснік міністра замежных спраў Беларусі Валянцін Рыбакоў прыняў удзел у тэматычным мерапрыемстве, прысвечаным фінансаванню Мэт устойлівага развіцця і супрацоўніцтва ў галіне падаткаў. Аб гэтым БЕЛТА паведамілі ў прэс-службе МЗС Беларусі.
З улікам вынікаў трэцяй міжнароднай канферэнцыі па фінансаванні развіцця, праведзенай у ліпені 2015 года ў Адыс-Абебе (Эфіопія), Валянцін Рыбакоў падкрэсліў важнасць мабілізацыі ўнутраных рэсурсаў для дасягнення ўстойлівага развіцця і ўмацавання ў першую чаргу падатковай сістэмы як аднаго з важных спосабаў мабілізацыі рэсурсаў для інвестыцый у развіццё. Беларускі дыпламат адзначыў, што ў сённяшнім свеце трансгранічных гандлёвых, інвестыцыйных і фінансавых аперацый меры ўнутранай палітыкі самі па сабе здольны аказаць толькі абмежаваны ўплыў, і заклікаў да скаардынаваных дзеянняў краін для ўмацавання падатковага патэнцыялу, узмацнення мер па барацьбе з адмываннем грошай і арганізацыі ўзаемнай прававой дапамогі.
Валянцін Рыбакоў падкрэсліў важнасць гэтых пытанняў для краін з сярэднім узроўнем даходу і неабходнасць уліку патрэбнасцей такіх краін пры міжнародным супрацоўніцтве.
Мерапрыемства было арганізавана Пастаянным прадстаўніцтвам Панамы пры ААН сумесна з Арганізацыяй эканамічнага супрацоўніцтва і развіцця ў сувязі з правядзеннем другога форуму Эканамічнага і Сацыяльнага Савета ААН па далейшай дзейнасці ў галіне фінансавання развіцця.-0-
