19 ліпеня, Мінск /Міхаіл Маціеўскі - БЕЛТА/. Беларусь і Расія маглі б канкурыраваць з кім хочаце, калі б менш таргаваліся паміж сабой. Аб гэтым на сустрэчы з Прэзідэнтам Беларусі Аляксандрам Лукашэнкам заявіў сёння старшыня фракцыі Камуністычнай партыі Расійскай Федэрацыі ў Дзяржаўнай думе Генадзь Зюганаў, перадае карэспандэнт БЕЛТА.
"Калі б мы дапаўнялі адзін аднаго і адначасова менш таргаваліся вакол цаны то на нафту, то на газ, то на мяса, то на малако, а думалі аб эфектыўнай кааперацыі, мы былі б канкурэнтныя з кім хочаце, прычым наша прадукцыя была б не горшая і на трэць таннейшая за еўрапейскую, і мы не аддалі б свае рынкі нікому", - падкрэсліў Генадзь Зюганаў.
Лідар КПРФ адзначыў, што Беларусь мае цудоўны машынабудаўнічы комплекс, а таксама ўдзяляе шмат увагі развіццю сельскай гаспадаркі. "Я быў на ўсіх вашых вялікіх прадпрыемствах. Ваш МАЗ стандарту Еўра-6 падобны на касмічны карабель, адна з лепшых машын. Вашы трэйлеры, якія возяць нашы "Таполі", мы сёння ўжо не зробім, а вы дапамагаеце нам умацаваць абарону. Мы разам вырашаем гэтыя задачы", - сказаў ён.
Генадзь Зюганаў паабяцаў, што яго партыя зробіць усё для ўпэўненага развіцця Саюзнай дзяржавы.-0-
