Структуру СНД неабходна карэкціраваць для атрымання краінамі-ўдзельніцамі большай аддачы. Аб гэтым заявіў 16 мая журналістам міністр замежных спраў Беларусі Уладзімір Макей па выніках перагавораў з расійскім калегам Сяргеем Лаўровым, перадае карэспандэнт БЕЛТА.
Уладзімір Макей, у прыватнасці, адзначыў, што ў час перагавораў абмяркоўвалася максімальнае выкарыстанне інтэграцыйных фарматаў, развіццё кантактаў з трэцімі краінамі, але з улікам інтарэсаў усіх членаў Еўразійскага эканамічнага саюза. "Мы таксама абмяркоўвалі пытанне ўдасканалення і мадэрнізацыі СНД. Тут у нас пазіцыі адзіныя: Садружнасць павінна заставацца дзеяздольнай арганізацыяй", - сказаў міністр. Пры гэтым ён звярнуў увагу, што карэкціраваць структуру гэтага інтэграцыйнага аб'яднання трэба такім чынам, каб краіны-ўдзельніцы атрымлівалі большую аддачу.
Паводле слоў кіраўніка беларускага МЗС, на перагаворах таксама ўдзялялася ўвага ўзаемадзеянню ў міжнародных арганізацыях. "Мы разам настойліва і паслядоўна папулярызуем на міжнароднай арэне пакет агульных каштоўнасцей", - сказаў міністр. Уладзімір Макей таксама адзначыў, што Беларусь падтрымлівае ініцыятывы расійскага боку па раззбраенні на міжнародных пляцоўках.
Наконт сітуацыі на ўсходзе Украіны, паводле слоў Уладзіміра Макея, на перагаворах з Сяргеем Лаўровым яны прыйшлі да думкі, што дасягнутыя мінскія дамоўленасці з'яўляюцца адзіным дзейсным механізмам для забеспячэння міру і стабільнасці. "Мы таксама высока цэнім намаганні Расіі па стрымліванні тэрарызму на Блізкім Усходзе", - сказаў Уладзімір Макей. Ён таксама дадаў, што, на думку беларускага боку, альтэрнатывы міжсірыйскаму палітычнаму дыялогу на сёння няма.
Кіраўнік МЗС Беларусі адзначыў, што ў наступным годзе будзе адзначацца 25-годдзе ўстанаўлення дыпламатычных адносін паміж Беларуссю і Расіяй. У сувязі з гэтым субяседнікі абмяркоўвалі правядзенне адпаведных святочных мерапрыемстваў.
