Інтэграцыя ў аграпрамысловым комплексе Віцебскай вобласці дала станоўчыя вынікі і будзе паглыбляцца ў новай пяцігодцы. Аб гэтым карэспандэнту БЕЛТА паведаміў старшыня аблвыканкама Мікалай Шарстнёў, каменціруючы праект праграмы сацыяльна-эканамічнага развіцця Беларусі на 2016-2020 гады, які будзе абмяркоўвацца на пятым Усебеларускім народным сходзе.
"У новай пяцігодцы па ўсёй Беларусі запланаваны структурныя пераўтварэнні ў АПК. Рэальная схема павелічэння аб'ёмаў вытворчасці і, галоўнае, зніжэння затрат - стварэнне новых і развіццё дзеючых інтэграцыйных структур. Гэта сусветная практыка. З вялікімі вытворцамі будзе мець справу сур'ёзны пакупнік і партнёр. Вядучыя сусветныя кампаніі ў галіне сельскай гаспадаркі ўжо даўно выкарыстоўваюць прынцып вертыкальнай інтэграцыі. За аб'яднаннем і ўзбуйненнем - будучыня. І мы ўжо ідзём у гэтым напрамку, згрупаваўшы некалькі прадпрыемстваў на аснове тэхналагічнай залежнасці для стварэння канечнага прадукту", - адзначыў Мікалай Шарстнёў.
Ён растлумачыў, што першапачаткова гэта была неабходная мера для перазагрузкі АПК рэгіёна з улікам яго стану і крытычнага ўзроўню крэдытнай нагрузкі на перапрацоўчых прадпрыемствах. "На прадпрыемствах, якія ўваходзяць у склад гэтых структур, сфарміравана адзіная сістэма кіравання, што дасць магчымасць паступова знізіць сабекошт тавараў, павялічыць вытворчасць сельгаспрадукцыі на 40-50 працэнтаў. Атрымаем высокую дабаўленую вартасць і канкурэнтаздольнасць як на ўнутраным, так і на знешніх рынках", - дадаў Мікалай Шарстнёў.
Цяпер працуюць пяць кааперацыйна-інтэграцыйных структур на базе Віцебскага мясакамбіната, Віцебскай бройлернай птушкафабрыкі, Глыбоцкага камбікормавага завода, Полацкага камбіната хлебапрадуктаў, Аршанскага камбіната хлебапрадуктаў. Сюды ўвайшлі свінакомплексы, птушкафабрыкі, прадпрыемствы па адкормілаванні буйной рагатай жывёлы, вялікія малочнатаварныя фермы і гаспадаркі. У суме яны маюць 300 тыс.га сельгасугоддзяў і амаль 200 тыс. га ворнай зямлі - 24 працэнты агульнай плошчы зямель у вобласці.
Больш як за год з пачатку стварэння інтэграцыйных структур дасягнуты дадатныя вынікі. Напрыклад, за студзень-май бягучага года вытворчасць малака па ўсіх структурах вырасла на 2,7 працэнта (па Аршанскай і Полацкай структурах - на 7,5 працэнта і 7,1 працэнта адпаведна), гадоўля БРЖ - на 2,8 працэнта, свіней - у 1,3 раза, птушкі - на 25,3 працэнта. У выніку за пяць месяцаў тэмп росту валавой прадукцыі сельскай гаспадаркі склаў 112,1 працэнта, у асобных структурах нават больш. Акрамя таго, за студзень-красавік узрасла выручка ад рэалізацыі прадукцыі да ўзроўню мінулага года на Br343,5 млрд, або на 11,9 працэнта.
"Аднак павелічэнне асноўных вытворчых паказчыкаў адбылося за кошт выкарыстання абаротных сродкаў галаўных прадпрыемстваў, якіх на сёння недастаткова. Для выхаду на стабільную работу ўсіх удзельнікаў фарміраванняў трэба прыняцце асобнага ўказа Прэзідэнта. Гэта дасць магчымасць вызваліць грашовыя сродкі для вываду сельскагаспадарчых структурных падраздзяленняў на тэхналагічныя параметры вытворчасці. Гэтыя грошы стануць галоўнай крыніцай фінансавання мерапрыемстваў па мадэрнізацыі, тэхпераўзбраенні ўсіх інтэграцыйных структур. Мы не просім бясплатнага спісання іх даўгоў, а спадзяёмся на адтэрміноўку і растэрміноўку, каб вызваліць грашовыя рэсурсы і накіраваць іх у вытворчасць", - сказаў на заканчэнне Мікалай Шарстнёў
