19 кастрычніка, Мінск /Кар. БЕЛТА/. У Беларусі можа быць створана больш за 60 цэнтраў эканамічнага росту ў рэгіёнах, паведаміў сёння міністр эканомікі Уладзімір Зіноўскі, адкрываючы XVIII Міжнародную навуковую канферэнцыю "Праблемы прагназавання і дзяржаўнага рэгулявання сацыяльна-эканамічнага развіцця", перадае карэспандэнт БЕЛТА.
Міністр падкрэсліў, што важным фактарам росту эканомікі краіны павінна стаць правільная рэгіянальная палітыка, якая ўключае тры ўзаемадапаўняльныя вектары. "Першы - гэта фарміраванне цэнтраў эканамічнага росту ў тых раёнах і гарадах, дзе ёсць патэнцыял. Даследаванні НДЭІ Мінэканомікі паказалі, што ў Беларусі можа быць сфарміравана больш за 60 такіх цэнтраў, якія ахопяць дзве трэці тэрыторыі краіны. Другі - стварэнне па-за цэнтрамі эканамічнага росту рабочых месц у межах гадзіннай даступнасці. Трэці - стварэнне камфортных умоў на ўсёй тэрыторыі краіны, што запатрабуе развітой сучаснай інфраструктуры", - растлумачыў ён.
Паводле слоў Уладзіміра Зіноўскага, патрэбны сістэмныя рашэнні па многіх пытаннях, перш за ўсё - змяненне падыходаў да інвестыцыйнай дзейнасці. "Вырашыць гэту задачу магчыма толькі на аснове цеснай каардынацыі трох палітык: навукова-тэхналагічнай, прамысловай і рэгіянальнай", - адзначыў ён.
У якасці такога сістэмнага рашэння Уладзімір Зіноўскі назваў план індустрыялізацыі рэгіёнаў, задача па распрацоўцы якога пастаўлена перад НДЭІ Мінэканомікі. У аснове плана - тры блокі. "Першы - вызначэнне прыярытэтных відаў эканамічнай дзейнасці, тэхналагічных ніш, адпаведных ім канкрэтных праектаў, якія будуць прапанаваны бізнесу на выбар для рэалізацыі. Другі - размяшчэнне адабраных праектаў зыходзячы са спецыялізацыі раёнаў і з улікам іх кадравага, вытворчага і сыравіннага патэнцыялу. Пры гэтым адной з галоўных умоў павінна стаць ураўнаважанае развіццё рэгіёнаў. Трэці - фарміраванне пакета стымулюючых мер рэспубліканскага і рэгіянальнага ўзроўняў для рэалізацыі праектаў", - расказаў ён.
Пры гэтым міністр падкрэсліў, што стаўка на малы і сярэдні бізнес з'яўляецца элементам доўгатэрміновай стратэгіі дзяржавы. "Наша задача - павялічыць долю суб'ектаў малога і сярэдняга прадпрымальніцтва да 50 працэнтаў да 2030 года", - заявіў ён.
Завяршаючы выступленне, Уладзімір Зіноўскі абазначыў ключавыя задачы сённяшняга дня, якія патрабуюць актыўнага ўдзелу эканамічнай навукі. У іх ліку міністр назваў удасканаленне галіновай, тэхналагічнай і тэрытарыяльнай структуры эканомікі, каб зрабіць яе менш адчувальнай да знешніх шокаў, распрацоўку методык для генерацыі інавацыйных інвестпраектаў з высокапрадукцыйнымі рабочымі месцамі, стварэнне развітога інстытуцыянальнага асяроддзя, удасканаленне методык прагназавання.-0-
