2 красавіка, Мінск /Кар. БЕЛТА/. Еўразійская эканамічная камісія пры складанні гласарыя тэрмінаў блокчэйн-эканомікі выкарыстала беларускі вопыт і канкрэтна - гласарый дэкрэта нумар 8 "Аб развіцці лічбавай эканомікі". Аб гэтым заявіў у эфіры тэлеканала "Беларусь 1" член Савета па развіцці прадпрымальніцтва Дзяніс Алейнікаў, паведамляе БЕЛТА.
"На сённяшні дзень да нас праяўляе цікавасць ЕЭК, дзе падрыхтаваны першы праект гласарыя тэрмінаў блокчэйн-эканомікі, уключаючы крыптавалюты, токены, смарт-кантракт і іншыя. Прыемна, што на 80 працэнтаў гэты праект гласарыя ЕЭК створаны на базе гласарыя дэкрэта нумар 8", - сказаў Дзяніс Алейнікаў.
Тлумачачы сутнасць самога дакумента аб развіцці лічбавай эканомікі, ён адзначыў, што дэкрэт не прысвечаны аднаму толькі блокчэйну, а апасродкуе рэалізацыю каля 40 важных відаў дзейнасці ў тэхналагічнай сферы. "Гэта і развіццё ІТ-адукацыі, і праграмы развіцця беспілотнага транспарту, штучнага інтэлекту, кіберспорту і гэтак далей. А блокчэйн выступіў кропкай росту інтарэсаў, ён арганізаваў віральную (ад англ. viral - вірусны) рэкламу нашай краіны па ўсім свеце", - дадаў Дзяніс Алейнікаў.
Паводле яго слоў, цяпер пры згадванні Беларусі субяседнікі з іншых краін успамінаюць не толькі чыстыя вуліцы, добрыя прадукты, але яшчэ і такія словы і паняцці, як лічба, блокчэйн, дэкрэт нумар 8. "Інтэрнэт аб'яднаў тэхналагічны свет, і мы як яго неад'емная частка цалкам можам паспрачацца за права стаць яго цэнтрам", - адзначыў Дзяніс Алейнікаў. - Размаўляючы з прадстаўнікамі са сферы тэхналогій у Маскве, я бачу захапленне ў вачах наконт такога прарыву на дзяржаўным узроўні".
Рэформы, што адбываюцца ў краіне, уплываюць і на інтарэс буйных ігракоў рынку. Дзяніс Алейнікаў прагназуе, што калі цяпер Парк высокіх тэхналогій ужо прыцягвае шырокі зрэз тэхналагічнай супольнасці розных краін (ад стартапаў, што развіваюцца, да сур'ёзных кампаній сярэдняга ўзроўню), то гэта толькі першая хваля інтарэсу, якая прыкладна за два гады прывядзе да нас тытанаў галіны.-0-
