26 ліпеня, Мінск /Юлія Огнева - БЕЛТА/. План па стварэнні новых рабочых месц у І квартале перавыкананы на 90 працэнтаў, паведаміў сёння прэм'ер-міністр Беларусі Андрэй Кабякоў на пасяджэнні Прэзідыума Савета Міністраў "Аб ходзе работы па выкананні ў 2016 годзе заданняў па стварэнні новых рабочых месц і працаўладкаванні на іх грамадзян", перадае карэспандэнт БЕЛТА.
"Даныя, якія прадстаўлены, сведчаць, што ў цэлым даведзеныя заданні з пачатку года выконваюцца. Запланавана стварыць рабочыя месцы для 8 тыс. 320 чалавек па выніках першага квартала, працаўладкавана 15 тыс. 824. Аднак не забяспечылі выкананне задання ў першым квартале канцэрн "Белнафтахім", Гродзенскі, Мінскі і Магілёўскі аблвыканкамы", - адзначыў Андрэй Кабякоў.
Пастаўлена задача па штогадовым стварэнні не менш як 50 тыс. рабочых месц і працаўладкаванні на іх грамадзян. Гэта даручэнне замацавана ва ўказе нумар 78. Па выніках года ўраду неабходна будзе даць справаздачу аб яго выкананні. У мэтах забеспячэння выканання міністэрствам і канцэрнам, аблвыканкамам даведзены канкрэтныя заданні.
"Работа па працаўладкаванні грамадзян на новыя рабочыя месцы ў першую чаргу накіравана на дасягненне канкрэтнага станоўчага выніку, спыненне негатыўных тэндэнцый на рынку працы. Пакуль жаданы вынік не дасягнуты, - сказаў Андрэй Кабякоў. - Нягледзячы на перавыкананне задання амаль у два разы, інфармацыя, што паступае ва ўрад, сведчыць аб захаванні сацыяльнай напружанасці ў шэрагу працоўных калектываў, выкліканай няпоўнай занятасцю, асабліва ў арганізацыях прамысловасці і будаўніцтва".
Паводле слоў прэм'ер-міністра, калі бачнага эфекту ў вырашэнні праблем занятасці няма, неабходна знайсці прычыны гэтага. "Найбольш відавочная ў якасных характарыстыках ствараемых рабочых месц. Каб вырашыць праблему занятасці, неабходна ствараць высокаэфектыўныя і запатрабаваныя рабочыя месцы, якія сапраўды патрэбны арганізацыям і не стануць для іх у далейшым своеасаблівым баластам. Выкананне даручэння кіраўніка дзяржавы па стварэнні 50 тыс. новых рабочых месц не павінна рэалізоўвацца за кошт іншых мер па павышэнні эфектыўнасці работы прадпрыемстваў", - упэўнены прэм'ер-міністр.
Ён канстатаваў, што Мінпрацы і сацабароны сумесна з Мінэканомікі, аблвыканкамамі і Мінскім гарвыканкамам было даручана правесці адпаведны аналіз якасці рабочых месц, у тым ліку з выездам на месцы.
"Яшчэ адно важнае пытанне - дакладнасці прадастаўляемай інфармацыі па колькасці працаўладкаваных грамадзян на новыя рабочыя месцы", - адзначыў Андрэй Кабякоў. Кіраўніком дзяржавы даручана забяспечыць дакладнасць даных. Андрэй Кабякоў падкрэсліў, што неабходна ўважліва разгледзець атрыманыя вынікі і прааналізаваць падыходы, якія прымяняюцца. "Павінна прымяняцца адзіная зразумелая метадалогія. На месцах павінна быць выразнае разуменне, як забяспечыць бачны і якасны вынік", - рэзюмаваў ён.-0-
