15 чэрвеня, Лагойскі раён /Кар. БЕЛТА/. Перадавыя тэхналогіі на малочнатаварным комплексе ў сельскагаспадарчым цэху "Гайна" Мінскага трактарнага завода забяспечаць высокую прадукцыйнасць. Аб гэтым паведаміў журналістам міністр сельскай гаспадаркі і харчавання Беларусі Леанід Заяц 14 чэрвеня пасля цырымоніі адкрыцця МТК, перадае карэспандэнт БЕЛТА.
"У гаспадарцы пабудаваны малочнатаварны комплекс на 777 галоў з перадавымі тэхналогіямі, якія павінны забяспечыць высокую прадукцыйнасць і якасць малака, захаванасць пагалоўя. Аснашчана сучасная даільная зала, унікальныя ахаладжальнікі малака для захоўвання і наступнай адпраўкі на малочны завод. Тут светлыя памяшканні, добрыя выпасныя двары з кармавымі пляцоўкамі. Зроблена ўсё па тэхналогіі", - сказаў Леанід Заяц.
Міністр адзначыў, што ў Беларусі большасць сельгасарганізацый, якія належаць да прамысловых прадпрыемстваў, маюць высокія вытворчыя і якасныя паказчыкі. "Такіх філіялаў у краіне нямала, удзячны Міністэрству прамысловасці, інтэгратарам, якія ўзялі пад крыло сельгаспрадпрыемствы. Гэта быў вельмі вывераны і своечасовы крок з боку дзяржавы", - адзначыў міністр.
У цырымоніі адкрыцця малочнатаварнага комплексу таксама прынялі ўдзел старшыня Савета Рэспублікі Міхаіл Мясніковіч, памочнік Прэзідэнта - інспектар па Мінскай вобласці Ігар Яўсееў, першы намеснік старшыні Мінаблвыканкама Ігар Макар.
Малочнатаварны комплекс "777" на аналагічную колькасць галоў дойнага статка - гэта прадпрыемства замкнёнага цыкла ад нараджэння цяляці да ўводу яго ў асноўны статак. У складзе комплексу ёсць сянажныя траншэі, склад для захоўвання камбікармоў, мелесу і г.д. Тут створана больш за 30 рабочых месцаў. Магутнасць сельскагаспадарчага комплексу разлічана на атрымнанне звыш 5,5 тыс. т малака ў год. Ферма была пабудавана менш як за год. У маі 2017 года заклалі капсулу на месцы будаўніцтва.
Сельскагаспадарчы цэх "Гайна" Мінскага трактарнага завода спецыялізуецца на вырошчванні збожжа з развітой жывёлагадоўляй. У планах у сельгаспрадпрыемства будаўніцтва комплексу па захоўванні збожжа ўмяшчальнасцю 6 тыс. т.-0-