13 верасня, Мінск /Кар. БЕЛТА/. Нацыянальны банк расказаў, як змяніліся цэны на мяса, садавіну і агародніну. Даныя прыводзяцца ў аглядзе аб дынаміцы змянення спажывецкіх цэн і тарыфаў у жніўні 2018 года, паведамляе БЕЛТА.
Прырост спажывецкіх цэн у жніўні склаў 5 працэнтаў у гадавым выражэнні. Адносна ліпеня ў жніўні спажывецкія цэны выраслі на 0,1 працэнта.
У жніўні адзначаюцца больш высокія гадавыя тэмпы росту асноўных цэнавых індыкатараў у параўнанні з папярэднім месяцам. Іх павелічэнне ў многім абумоўлена эфектам нізкай базы мінулага года, адзначылі ў Нацбанку.
Гадавая базавая інфляцыя ў жніўні склала 3,3 працэнта (3 працэнты на месяц раней). Пры гэтым прырост названага паказчыка за месяц не перасягнуў сярэднямесячнага тэмпу базавай інфляцыі ў бягучым годзе. Паскораны рост цэн, які адзначаўся ў чэрвені-ліпені, на мяса птушкі змяніўся стабілізацыяй іх дынамікі. Разам з тым назіраецца часовае паскарэнне росту цэн на тавары-заменнікі (свініну).
Агрэгіраваны паказчык трэндавай інфляцыі ў жніўні вырас на 3,4 працэнта ў гадавым выражэнні супраць 3,2 працэнта на месяц раней. Адносна ліпеня трэндавая інфляцыя склала 0,3 працэнта, што адпавядае яе сярэднямесячнай дынаміцы ў бягучым годзе. Сярэдняя інтэнсіўнасць прыросту спажывецкіх цэн склала 3 працэнты адносна жніўня 2017 года, пры гэтым месячны прырост паказчыка захаваўся на ўзроўні папярэдняга месяца.
Адміністрацыйна рэгулюемыя цэны і тарыфы ў гадавым выражэнні павялічыліся на 9,7 працэнта (9,1 працэнта на месяц раней). Гэтаму садзейнічала павышэнне цэн у першую чаргу на паліва, а таксама на моцныя алкагольныя напіткі і тытунёвыя вырабы.
Цэны на плодаагароднінную прадукцыю ў гадавым выражэнні выраслі на 3 працэнты (зніжэнне на 7,3 працэнта ў ліпені 2018 года). У цэлым бягучая дынаміка цэн на сезонную агародніну і садавіну адпавядае характэрнай для гэтага перыяду года траекторыі, канстатавалі ў Нацбанку. Разам з тым у выніку значнага павелічэння цэн па асобных пазіцыях (белакачанная капуста, бананы, цытрусавыя) цэны на плодаагароднінную прадукцыю ў жніўні знізіліся ў меншай ступені, чым на год раней.-0-