23 жніўня, Мінск /Уладзімір Мацвееў - БЕЛТА/. Далейшыя дзеянні па зніжэнні стаўкі рэфінансавання ў Беларусі будуць цесна ўвязаны з плацежным балансам краіны. Аб гэтым заявіў журналістам, адказваючы на пытанне карэспандэнта БЕЛТА, старшыня праўлення Нацыянальнага банка Павел Калаур.
"Што датычыцца далейшых крокаў, безумоўна, мы будзем дзейнічаць вельмі ўзважана, асцярожна, ацэньваючы ў першую чаргу стан плацежнага балансу, робячы адпаведныя прагнозы на будучае", - заявіў старшыня праўлення Нацбанка.
Павел Калаур падкрэсліў, што Нацбанк праводзіць сваю палітыку ў цесным узаемадзеянні з урадам. "Пазітыўныя вынікі манетарнай палітыкі шмат у чым абумоўлены тымі мерамі, якія прымаюцца ў фіскальнай і эканамічнай сферах. Праводзячы такую збалансаваную палітыку, маючы пазітыўны рэзультат па інфляцыі, па сітуацыі на валютным рынку, праўленне Нацбанка свядома і цалкам прафесіянальна зрабіла выбар у частцы таго, каб яшчэ раз знізіць стаўку рэфінансавання. Мы ведаем, што гэта выклікала пэўную дыскусію грамадскасці. Але тым не менш гэта цалкам усвядомленыя і прафесіянальныя дзеянні з улікам той макраэканамічнай сітуацыі, якая складваецца ў эканоміцы", - заявіў ён.
Стаўка рэфінансавання ў Беларусі з 17 жніўня зніжана на 2 працэнтныя пункты да 18 працэнтаў гадавых. Адпаведнае рашэнне было прынята праўленнем і камітэтам па манетарнай палітыцы Нацыянальнага банка 3 жніўня зыходзячы з аналізу дынамікі інфляцыйных працэсаў, стану плацежнага балансу і яго бягучага рахунку, сітуацыі на валютным і фінансавым рынках рэспублікі. Таксама з 25 працэнтаў да 23 працэнтаў гадавых зніжаны стаўкі па пастаянна даступных і двухбаковых аперацыях Нацыянальнага банка па падтрымцы бягучай ліквіднасці банкаў.
У бягучым годзе стаўка рэфінансавання ў Беларусі зніжалася таксама з 1 ліпеня - на 2 працэнтныя пункты да 20 працэнтаў гадавых, з 1 мая - на 2 працэнтныя пункты да 22 працэнтаў гадавых, з 1 красавіка - на 1 працэнтны пункт да 24 працэнтаў. Да гэтага ў краіне стаўку рэфінансавання змянялі толькі 9 студзеня 2015 года, калі яна была павялічана на 5 працэнтных пунктаў і склала 25 працэнтаў гадавых.-0-
