3 жніўня, Мінск /Кар. БЕЛТА/. Эксперты Сусветнага банка станоўча ацанілі прынятыя ў Беларусі меры па лібералізацыі ў будаўніцтве ў адпаведнасці з дэкрэтам нумар 7. Аб гэтым паведаміў начальнік галоўнага ўпраўлення архітэктурнай, навуковай і інавацыйнай палітыкі Міністэрства архітэктуры і будаўніцтва Арцём Юшкевіч у час анлайн-канферэнцыі на сайце БЕЛТА.
"Эксперты Сусветнага банка, якія вывучалі новыя дакументы, працавалі непасрэдна з суб'ектамі гаспадарання, станоўча ацанілі прынятыя змяненні", - адзначыў Арцём Юшкевіч.
Разам з тым адназначна прагназаваць паляпшэнне пазіцый Беларусі ў рэйтынгу Сусветнага банка Doing Business дзякуючы лібералізацыі будаўнічай сферы прадстаўнік Мінбудархітэктуры не стаў. "Гэта залежыць не толькі ад нашых дзеянняў, але і ад таго, якія рэформы за гэты год адбудуцца ў іншых дзяржавах", - сказаў ён.
Арцём Юшкевіч падкрэсліў, што цяперашняя 22-я пазіцыя Беларусі ў рэйтынгу Doing Business па крытэрыі атрымання дазволаў на будаўніцтва - ужо вельмі высокая.
"Вядома, спадзяёмся, што паднімемся ў рэйтынгу, і эксперты Сусветнага банка гэтыя чаканні падзяляюць, - дадаў ён. - А гэта непасрэдна ўплывае на прыцягненне замежных інвестыцый".-0-
