8 лютага, Бабруйск /Кар. БЕЛТА/. Галоўны вынік Года культуры - павялічаная цікавасць да нацыянальнай культуры. Аб гэтым заявіў на калегіі Міністэрства культуры па выніках работы ў 2016 годзе кіраўнік ведамства Барыс Святлоў, перадае карэспандэнт БЕЛТА.
"Галоўным вынікам Года культуры трэба лічыць павялічаную цікавасць шырокіх грамадскіх колаў да нацыянальнай культуры, мовы, літаратуры", - лічыць міністр. Год культуры стаў часам стратэгічных рашэнняў. Прыняты Кодэкс аб культуры і дзяржаўная праграма "Культура Беларусі" на 2016-2020 гады.
Рэалізаваны новыя культурныя ініцыятывы - рэспубліканскія конкурсы "Чалавек Года культуры", "Горад культуры ў Год культуры", "Геній-стартап", "Бела-тон", нацыянальная прэмія ў галіне выяўленчага мастацтва.
Разам з тым міністр адзначыў ацэнку кіраўніка дзяржавы аб тым, што мінулы год не стаў часам істотных дасягненняў, і гэта сігнал, каб разабрацца, якія крокі неабходна зрабіць для паляпшэння сітуацыі, сказаў Барыс Святлоў.-0-
