22 чэрвеня, Мінск /Кар. БЕЛТА/. Рэкорд па масавай зборцы фігурак арыгамі на час устанавілі ў Мінску 21 чэрвеня, у дзень прэм'еры поўнаметражнага мультфільма культавага японскага рэжысёра Хаяа Міядзакі "Рыбка Поньё на ўцёсе" ў беларускім агучванні, паведамляе карэспандэнт БЕЛТА.
Усе гледачы, якія прыйшлі на прэм'еру, перад паказам прайшлі экспрэс-майстар-клас па складванні з паперы фігуркі рыбкі. Відэа трансліравалася на экране некалькі разоў, а затым гледачы за тры хвіліны павінны былі скласці іх як мага больш. Вынікі агучаны пасля прагляду карціны - 560 папяровых рыбак. Такая лічба будзе афіцыйна рэгістравана ў Кнізе рэкордаў краін СНД і Балтыі "Дзіва", а рыбак падораць выхаванцам дзіцячага дома-інтэрната для дзяцей-інвалідаў з асаблівасцямі псіхафізічнага развіцця.
Выбар фігуркі сімвалічны: галоўная гераіня новага фільма, які прадстаўляе гледачам праект "Беларускія ўік-энды", - рыбка. А арыгамі, як і анімэ, з'яўляецца адным з самых пазнавальных сімвалаў Японіі.
"Рыбка Поньё на ўцёсе" - дзясяты па ліку поўнаметражны фільм Хаяа Міядзакі, уладальніка ганаровай прэміі "Оскар" за выдатныя заслугі ў кінематографе і аўтара такіх вядомых работ, як "Унесеныя прывідамі" і іншыя. Сама стужка ў 2008 годзе была намініравана на "Залатога льва" - галоўны прыз Венецыянскага кінафестывалю - і ўдастоена дзвюх спецыяльных узнагарод гэтага прэстыжнага кінафоруму, а на год пазней стала лепшым анімацыйным фільмам па версіі Японскай акадэміі.
Паказы карціны "Рыбка Поньё на ўцёсе" выканала кампанія "Кінаконг", а падтрымлівае гэты праект, дзякуючы якому гледачы маюць магчымасць убачыць работы сусветнага кінематографа, кампанія velcom.-0-
