19 верасня, Мінск /Кар. БЕЛТА/. На Нацыянальнай кінастудыі "Беларусьфільм" пачалі здымаць мастацкі фільм "Не гульня", паведаміла карэспандэнту БЕЛТА прэс-сакратар "Беларусьфільма" Юлія Бальшакова.
Поўнаметражны ігравы фільм у жанры драмы здымае рэжысёр-пастаноўшчык Дзяніс Скварцоў. Аўтары сцэнарыя - Яўген Амельчанка, Канстанцін Гагарын, Дзяніс Нупрэйчык. Аператарам-пастаноўшчыкам з'яўляецца Віктар Бандаровіч. Мастак-пастаноўшчык - Андрэй Тоўсцік.
Па сюжэце малады амбіцыйны праграміст Аляксей Кузьмянкоў церпіць прафесійную няўдачу і прымае рашэнне, нягледзячы на адтэрміноўку, пайсці ў армію. Праходзячы службу, Аляксей робіць поўную перазагрузку свайго жыцця. Ён развітваецца з ілюзіямі адносна лёгкіх перамог і хуткіх дасягненняў, пераадольвае ўласныя слабасці і спакусы, сустракае надзейных і верных сяброў, становіцца сапраўдным мужчынам і адкрывае новыя перспектывы.
Галоўныя ролі выконваюць маладыя акцёры Павел Паўлюць, Мікіта Лубянько, Барыс Шумілін, Эльдар Данільчык.
Здымкі пройдуць у Мінску, на "Лініі Сталіна", Кургане Славы, у ваенным гарадку ў Печах.
Прэм'ера карціны адбудзецца ў 2018 годзе.-0-