1 лютага, Брэст /Аляўціна Чарнаволава - БЕЛТА/. Брэсцкая абласная філармонія ў Год культуры арганізуе па суботах музычныя паказы для ўсёй сям'і, паведаміла карэспандэнту БЕЛТА дырэктар установы культуры Таццяна Калтынаева.
Галоўныя наведвальнікі дзённых мерапрыемстваў - дзеці. Для маленькіх брастаўчан і іх бацькоў артысты філармоніі рыхтуюць розныя музычныя спектаклі, канцэрты класічнай музыкі, невялікія цыркавыя паказы. У займальнай форме дзецям яшчэ з ранняга дзяцінства будуць прывіваць любоў да мастацтва і музыкі ў прыватнасці. Так, 6 лютага пад акампанемент камернага аркестра адбудзецца паказ казкі-прытчы "Маленькі прынц". У гэтым жа месяцы ансамбль "Рапсодыя" прадставіць музычна-паэтычны паказ - сцэнкі з вясковага быту беларусаў паводле матываў твораў "Паўлінка" і "Несцерка". Запланаваны і іншыя сюрпрызы.
"Сямейныя суботы карыстаюцца папулярнасцю. Многія бацькі гавораць, што з задавальненнем правялі б вечар выхаднога дня ў філармоніі. Таму ў бліжэйшы час мы плануем арганізоўваць кожную суботу забаўляльныя мерапрыемствы і для дарослай аўдыторыі", - расказала Таццяна Калтынаева. Яна дадала, што праграма выхаднога дня будзе ўключаць канцэрты, спектаклі, музычна-літаратурныя, танцавальныя вечары.
Таксама ў Год культуры ў Брэсцкай абласной філармоніі будзе прадоўжана традыцыя правядзення музычных салонаў. Так, у лютым адбудзецца афіцэрскі баль, на які будуць запрошаны абаронцы Айчыны і іх спадарожніцы жыцця. А ў пачатку сакавіка плануецца правесці вясенні гарадскі баль.
Усяго ў 2016 годзе брэсцкай філармоніяй на розных пляцоўках Брэста і вобласці будзе арганізавана больш за 800 канцэртаў. Цікавыя музычныя мерапрыемствы для жыхароў рэгіёна рыхтуюць калектывы ўстановы культуры, будуць запрошаны вядомыя беларускія і замежныя артысты. У прыватнасці, у бліжэйшы час з канцэртамі Брэсцкую вобласць наведаюць Ірына Алеграва, Наргіз Закірава, экс-саліст легендарных "Песняроў" Леанід Барткевіч.-0-