30 лістапада, Мінск /Кар. БЕЛТА/. У Францыі ў ходзе суботніх маніфестацый супраць законапраекта "Аб глабальнай бяспецы" пацярпелі 98 паліцэйскіх. Аб гэтым паведамляе ТАСС са спасылкай на міністра ўнутраных спраў рэспублікі Жэральда Дарманена.
"Падагульняючыя даныя: 98 параненых сярод паліцэйскіх і жандараў. Я выказваю ім поўную падтрымку. Вінаватыя ў гэтым насіллі павінны быць прыцягнуты да адказнасці", - заявіў Жэральд Дарманен.
Пры гэтым, паводле інфармацыі МУС, двое маніфестантаў звярнуліся ў Генеральную інспекцыю са скаргай на насілле з боку паліцэйскіх. Вядома таксама, што ў час акцый пратэсту раненне ў галаву атрымаў сірыйскі фатограф-фрылансер Амір аль-Хальбі.
У час маніфестацый у Францыі праваахоўнікі затрымалі больш за 80 чалавек, якія ўдзельнічалі ў беспарадках.
28 лістапада ў 70 гарадах Францыі прайшлі акцыі пратэсту супраць праекта закона "Аб глабальнай бяспецы", палажэнні якога фактычна ўводзяць забарону на правядзенне фота- і відэаздымкі супрацоўнікаў паліцыі і жандармерыі. Арганізатарамі масавых шэсцяў выступілі прафсаюзы журналістаў, "Ліга абароны правоў чалавека" і іншыя грамадскія аб'яднанні.
Згодна з афіцыйнымі данымі, маршы пратэсту, якія адбыліся пад лозунгам "Апусціце зброю, і мы апусцім камеры", сабралі 133 тыс. чалавек. У многіх гарадах маніфестацыі суправаджаліся беспарадкамі і сутычкамі дэманстрантаў з паліцыяй.-0-
