7 красавіка, Мінск /Кар. БЕЛТА/. Кошт ф'ючарса на нафту маркі Brent з пастаўкай у чэрвені 2020 года ў час таргоў на біржы ICE ў Лондане па стане на 4:48 па маскоўскім часе вырас на 3,24 працэнта і складае $34,12 за бараль. Кошт ф'ючарса нафты WTI знаходзіцца на адзнацы $27,15 за бараль (+4,1 працэнта), паведамляе ТАСС.
Нафтавыя каціроўкі растуць на фоне будучых перагавораў міністраў ОПЕК у фармаце відэасувязі. Нарада ОПЕК павінна была адбыцца 6 красавіка, але была перанесена на 9-е чысло. Як паведамляе ТАСС, прычынай пераносу стала негатоўнасць удзельнікаў да папярэдняга кансэнсусу па індывідуальных аб'ёмах скарачэння здабычы нафты.
Здзелка ОПЕК, што трымалася на дамоўленасцях Расіі і Саудаўскай Аравіі на працягу трох гадоў і давала магчымасць стабілізаваць цэны на нафту на ўзроўні $60 за бараль шляхам абмежавання здабычы, завяршылася 31 сакавіка. Прадоўжыць яе не ўдалося з-за процілеглых пазіцый двух буйнейшых удзельнікаў. Спыненне дзеяння пагаднення прывяло да рэзкага зніжэння цэн на нафту, якое ўзмацнілася скарачэннем глабальнага попыту з-за пандэміі каранавіруса.-0-