28 кастрычніка, Мінск /Кар. БЕЛТА/. Сусветная арганізацыя аховы здароўя (СААЗ) накіравала ў Арменію і Азербайджан наборы для аказання экстраннай медыцынскай дапамогі людзям, якія пацярпелі ад баявых дзеянняў у раёне нагорнакарабахскага канфлікту і за яго межамі. Аб гэтым паведамляе Цэнтр навін ААН.
Як паведамляюць у арганізацыі, першая партыя траўматалагічных хірургічных камплектаў прыбыла ў Ерэван яшчэ 23 кастрычніка. Дапамога, прызначаная Баку, знаходзіцца ў дарозе. Партыі экстраннай дапамогі, якія накіроўваюцца ў міністэрствы аховы здароўя Арменіі і Азербайджана, уключаюць траўматалагічныя наборы, якіх павінна хапіць для аказання дапамогі сотням параненых.
У СААЗ падкрэсліваюць, што пацярпелым патрабуецца тэрміновая медыцынская дапамога. Група экстраннай дапамогі Еўрапейскага бюро СААЗ і яго работнікі на месцах у супрацоўніцтве з міністэрствамі абедзвюх краін у тэрміновым парадку высвятляюць, дзе і каму неабходна дапамога, і забяспечваюць яе аператыўную дастаўку.
У міжнароднай арганізацыі нагадваюць, для таго каб людзі маглі атрымаць лячэнне, каб медыцынскія супрацоўнікі не падвяргаліся небяспецы і каб спыніць распаўсюджванне COVID-19, неабходна неадкладна спыніць узброеныя дзеянні ў Нагорным Карабаху.
Сітуацыя ў рэгіёне абвастрылася 27 верасня, на спрэчнай тэрыторыі пачаліся актыўныя баі. Арменія і Азербайджан паведамляюць аб забітых і параненых, у тым ліку сярод грамадзянскага насельніцтва. Прэзідэнт Расіі Уладзімір Пуцін заявіў 22 кастрычніка, што абодва бакі канфлікту ў Нагорным Карабаху нясуць вялікія страты, агульная колькасць загінулых набліжаецца да 5 тыс. Арменія і Азербайджан ужо тройчы дасягалі дамоўленасці аб спыненні агню, аднак практычна адразу кожны з бакоў паведамляў аб парушэннях.-0-