24 снежня, Мінск /Кар. БЕЛТА/. Валейбалісткі "Мінчанкі" выйгралі Кубак Беларусі. Вырашальная гульня турніру ў сталічным спарткомплексе "Уручча" завяршылася з лікам 3:2 (25:14, 23:25, 27:29, 25:21, 15:11) на карысць падапечных Станіслава Салікава, паведамляе карэспандэнт БЕЛТА.
Зрэшты, шлях да перамогі знясіленай напружаным гульнявым графікам сталічнай дружыны лёгкім не назваць. Першы сэт прайшоў пад дыктоўку ўдзельніц расійскай суперлігі, якія пераўзыходзілі саперніц з Гродна ва ўсіх кампанентах валейбола і заслужана адсвяткавалі поспех. Здавалася б, мінчанкі і далей павядуць гульню ў такім ключы і даб'юцца поспеху, але дзе там.
Пасля перапынку сітуацыя на пляцоўцы змянілася. Валейбалісткі "Мінчанкі" сталі шмат памыляцца на блоку і ў абароне. Часам перавага "Камунальніка-ГрДУ" ў час другой партыі дасягала пяці і больш ачкоў. Сталічная каманда змагла за кошт вопыту матчаў на высокім узроўні скараціць адставанне да мінімуму.
Трэцяя партыя спачатку праходзіла з перавагай "Мінчанкі", але сілы пачалі пакідаць ігракоў гэтай дружыны. Спартсменкі Гродна скарысталіся сітуацыяй і, лепш правёўшы канцоўку сэта, давялі яго да перамогі. Адзначым пасуючую "Камунальніка-ГрДУ" Ганну Джафар, якая ўмела дырыжыравала дзеяннямі сваіх сябровак па камандзе, і Настассю Міклашэвіч, якая завяршала львіную долю атак дружыны ў зялёна-чорнай форме.
Чацвёрты сэт прайшоў у роўнай барацьбе. То адна, то другая каманда вырывалася наперад, але да канца сэта сітуацыя на пляцоўцы была невідавочнай. Станіслаў Салікаў з дапамогай замен ажывіў стомленую было дружыну і сталічныя валейбалісткі змаглі зраўнаваць лік па партыях. На тай-брэйку сталічная каманда канчаткова перахапіла ініцыятыву і дабілася такой цяжкай Перамогі.-0-
