28 кастрычніка, Мінск /Кар. БЕЛТА/. Выканкам Міжнароднага саюза сучаснага пяцібор'я (UIPM) зацвердзіў зменены фармат правядзення спаборніцтваў да Гульняў XXXIII Алімпіяды 2024 года ў Парыжы, паведамілі БЕЛТА ў прэс-службе НАК.
Новы фармат прадугледжвае змяненне часавых тэрмінаў правядзення спаборніцтваў і павінен скласці 90 хвілін, з якіх 20 хвілін займае турнір па выездцы, 15 хвілін - па фехтаванні, 10 хвілін - па плаванні і 15 хвілін - крос са стральбой. Паміж кожнай дысцыплінай пяціборства прадугледжаны 10-хвілінны перапынак. Новаўвядзенні павінны павысіць дынаміку турніру і зрабіць яго больш прывабным для тэлевізійнай трансляцыі.
Выканкам Міжнароднага алімпійскага камітэта (МАК) разгледзіць заяўку UIPM аб змяненні фармату спаборніцтваў 7 снежня на сваім пасяджэнні.-0-