9 лютага, Пекін /Кар. БЕЛТА/. На XXIV зімовых Алімпійскіх гульнях сёння плануецца разыграць шэсць камплектаў узнагарод, паведамляе карэспандэнт БЕЛТА.
З прадстаўнікоў Беларусі ў медальных спаборніцтвах прыме ўдзел толькі гарналыжніца Марыя Шканава, якой трэба будзе выйсці на старт слаламнай трасы. Пакуль у актыве беларускай алімпійскай дружыны адна ўзнагарода - серабро біятланіста Антона Смольскага ў індывідуальнай гонцы на 20 км.
Без беларускіх атлетаў будуць вызначаны чэмпіёны і прызёры ў спаборніцтвах па фрыстайле (мужчыны, біг-эйр), снаўбордзе (жанчыны, крос), шорт-трэку (мужчыны, 1500 м), лыжным дваябор'і (мужчыны), санным спорце (мужчыны, двойкі).
Усяго на пекінскай Алімпіядзе разыгрываецца 109 камплектаў узнагарод у сямі відах спорту. За алімпійскія медалі спрачаюцца прадстаўнікі 91 каманды. Беларускія атлеты выступаюць у шасці відах спорту: біятлон, фрыстайл, канькабежны спорт, горныя лыжы, фігурнае катанне, лыжныя гонкі. Закрыццё Гульняў адбудзецца 20 лютага.-0-
