8 лютага, Пекін /Кар. БЕЛТА/. На XXIV зімовых Алімпійскіх гульнях сёння плануецца разыграць дзесяць камплектаў узнагарод. Гэта самы медальны дзень пекінскіх Гульняў, паведамляе карэспандэнт БЕЛТА.
Галоўныя надзеі беларускіх балельшчыкаў звязаны з біятланістамі, якія прымуць удзел у мужчынскай індывідуальнай гонцы на 20 км з чатырма заходамі на стрэльбішча. На дыстанцыю адправяцца Дзмітрый Лазоўскі, Антон Смольскі, Максім Варабей і Мікіта Лабастаў. Пачатак гонкі на біятлоннай трасе ў Чжанцзякоу ў 11.30 па мінскім часе.
Акрамя таго, лыжнік Ягор Шпунтаў выступіць у спрынтарскай гонцы. Беларускі фігурыст Канстанцін Мілюкоў плануе прыняць удзел у кароткай праграме.
Без беларускіх атлетаў будуць вызначаны чэмпіёны і прызёры ў спаборніцтвах па фрыстайле (жанчыны, біг-эйр), гарналыжным спорце (мужчыны, супергігант), кёрлінгу (дабл-мікст), снаўбордзе (жанчыны, мужчыны, паралельны гіганцкі слалам), канькабежным спорце (мужчыны, 1500 м), лыжных гонках (жанчыны, спрынт), санным спорце (жанчыны, адзіночка).
Усяго на пекінскай Алімпіядзе разыгрываецца 109 камплектаў узнагарод у сямі відах спорту. За алімпійскія медалі спрачаюцца прадстаўнікі 91 каманды. Беларускія атлеты выступаюць у шасці відах спорту: біятлон, фрыстайл, канькабежны спорт, горныя лыжы, фігурнае катанне, лыжныя гонкі. Закрыццё Гульняў адбудзецца 20 лютага.-0-
