15 кастрычніка, Мінск /Кар. БЕЛТА/. Беларускі вадналыжнік Сцяпан Шпак стаў уладальнікам серабра ў скачках з трампліна на сусветных пляжных гульнях у Катары, паведамляе карэспандэнт БЕЛТА са спасылкай на прэс-службу НАК Беларусі.
Сцяпан Шпак лічыўся адным з фаварытаў спаборніцтваў і, упэўнена правёўшы ўсе тры спробы, у другой паказаў лепшы рэзуьтат - 59,2 м. Пераўзысці дасягненне беларуса змог толькі Уладзімір Ранзін з Расіі - 59,9 м. Трэцяе месца заняў Эміль Рытэр (Чылі) - 59,1 м.
"Рэзультатам задаволены. Сапернікі вельмі сур'ёзныя, няпростыя ўмовы. Тым не менш, справіўся. Арганізацыя гульняў на вышыні", - адзначыў беларускі спартсмен, падводзячы вынікі спаборніцтваў.
Сярэбраная ўзнагарода Сцяпана Шпака - трэцяя ў скарбонцы зборнай Беларусі па водных лыжах на I сусветных пляжных гульнях у Катары. Раней два медалі ў скачках з трампліна заваявалі Аляксандра Данішэўская (золата) і Ганна Стральцова (бронза).-0-