11 сакавіка, Мінск /Кар. БЕЛТА/. Міжнародны спартыўны камітэт глухіх (ICSD) аб'явіў аб нядопуску беларускіх спартсменаў на XXIV летнія Сурдлімпійскія гульні ў Бразіліі, паведамляе афіцыйны сайт арганізацыі.
Сурдлімпійскія (Дэфлімпійскія) гульні - спартыўныя спаборніцтвы для людзей з парушэннямі слыху. "Выканаўчы камітэт ICSD прыняў рашэнне выканаць рэкамендацыі МАК. Такім чынам, спартсмены з Беларусі і Расіі, а таксама афіцыйныя асобы абедзвюх краін не могуць быць дапушчаны да ўдзелу ў міжнародных спаборніцтвах у календары ICSD да далейшага паведамлення", - гаворыцца ў заяве арганізацыі.
Гэта азначае, што беларускія спартсмены не прымуць удзелу ў летніх Сурдлімпійскіх гульнях, якія пройдуць з 1 па 15 мая ў Кашыяс-ду-Сул. На спаборніцтвах нашу краіну павінны былі прадставіць 37 спартсменаў у пяці відах спорту: плаванні, вольнай і грэка-рымскай барацьбе, лёгкай атлетыцы і настольным тэнісе. На папярэдніх Сурдлімпійскіх гульнях, якія прайшлі ў 2017 годзе ў Турцыі, беларусы заваявалі 16 медалёў (4-9-3).-0-
