7 кастрычніка, Брэст /Кар. БЕЛТА/. У Пінску сёння адбудзецца шоу-матч паміж камандай беларускіх блогераў ФК "Інформ" і футбольным клубам "Хваля", паведаміў карэспандэнту БЕЛТА прадстаўнік прэс-службы пінскага ФК Віктар Сухаверхі.
Матч пройдзе ў 21.00 на натуральным полі Акадэміі футбола па вул.Сонечнай, 61. Уваход на таварыскі паядынак будзе свабодным для ўсіх жадаючых. На трыбунах змогуць размясціцца больш за 300 чалавек. У складзе каманды ФК "Інформ" - папулярныя блогеры, акцёры, спевакі і стрымеры, чыя сукупная аўдыторыя складае больш за 12 млн чалавек. Гаспадары выставяць свой юнацкі склад.
"Ініцыятыва зыходзіла ад мінчан. Яны на нас выйшлі, прапанавалі правесці такі матч. Мы спачатку паглядзелі наш графік - ён цяпер даволі насычаны, кожныя выхадныя ідуць гульні чэмпіянату сярод каманд першай лігі. У гэту нядзелю ў нас будзе адказны матч з ФК "Шахцёр-Петрыкаў". І кіраўніцтва трэнерскага штаба прыняло рашэнне правесці гэту маладзёжную таварыскую гульню ў пятніцу вечарам", - расказаў Віктар Сухаверхі.
У гэтым сезоне каманда беларускіх блогераў правяла ўжо чатыры такія сустрэчы з камандамі вышэйшай лігі - "Дынама-Брэст", "Дынама-Мінск", ФК "Віцебск" і ФК "Нёман". Сярод каманд першай лігі пінская "Хваля" згуляе з блогерамі першай. Акрамя ўласна матчу прадугледжваецца размова і сэлфі з ігракамі.
"Мы спачатку думалі правесці сустрэчу на нашым асноўным полі - стадыёне "Хваля". Але паколькі такое мерапрыемства ў нас будзе ўпершыню, час позні, невядома, колькі балельшчыкаў прыйдзе. Калі такі фармат пінчанам спадабаецца, у наступным годзе вопыт можа паўтарыць", - дадаў прадстаўнік ФК "Хваля".-0-
