24 сакавіка, Мінск /Кар. БЕЛТА/. Беларускі форвард "Нью-Джэрсі Дэвілз" Ягор Шаранговіч прызнаны першай зоркай матчу рэгулярнага чэмпіянату НХЛ з "Філадэльфіяй Флаерз", паведамляе карэспандэнт БЕЛТА.
У гасцявым паядынку хакеісты "Нью-Джэрсі" абыгралі "Філадэльфію" з мінімальнай перавагай - 4:3 (2:1, 2:0, 0:2). Ягор Шаранговіч вызначыўся ў сярэдзіне другога перыяду, зрабіўшы лік 3:1, а за 20 секунд да яго заканчэння стаў адным з асістэнтаў Трэвіса Зэйджэка пры чацвёртым узяцці варот гаспадароў пляцоўкі. У 28 праведзеных матчах 22-гадовы беларускі нападаючы закінуў 7 шайбаў і зрабіў 5 рэзультатыўных перадач. Больш шайбаў у складзе "д'яблаў" закінуў толькі Майлз Вуд, у якога 9 дакладных кідкоў.
Цяпер "Нью-Джэрсі" займае 7-е месца сярод 8 клубаў Усходняй канферэнцыі, набраўшы 28 ачкоў у 30 праведзеных паядынках. Лідзіруе тут "Нью-Ёрк Айлендэрс", у якога 46 балаў пасля 33 гульняў. Два наступныя матчы хакеісты "Дэвілз" правядуць у гасцях у "Вашынгтон Кэпіталз", у актыве якога 44 ачкі і другая пазіцыя ў табліцы Усходняй канферэнцыі.-0-
