4 жніўня, Мінск /Кар. БЕЛТА/. Беларуская тэнісістка Аляксандра Сасновіч (119-ы нумар рэйтынгу WTA) сёння правядзе стартавы паядынак асноўнай сеткі турніру ў італьянскім Палерма з прызавым фондам $202 тыс., паведамляе карэспандэнт БЕЛТА.
У матчы 1/16 фіналу адзіночнага разраду Аляксандра Сасновіч сустрэнецца з 23-й ракеткай свету бельгійскай тэнісісткай Элізэ Мертэнс. У трох іх папярэдніх сустрэчах беларуска атрымала дзве перамогі, бельгійка выйграла адзін раз. Пераможца сённяшняга матчу ў 1/8 фіналу згуляе з прадстаўніцай Італіі Ясмін Пааліні (95).
У асноўную сетку спаборніцтваў у сіцылійскай сталіцы Аляксандра Сасновіч прабілася праз кваліфікацыю, перамогшы расіянку Настассю Камардзіну (201), чэшку Тэрэзу Марцінцаву (133) і іспанку Лару Аруабарэну-Весіна (154).
Турнір Palermo Ladies Open, які фінішуе 9 жніўня, стаў першым афіцыйным пасля перапынку, звязанага з пандэміяй COVID-19.-0-