28 сакавіка, Мінск /Кар. БЕЛТА/. Завершаны асабісты чэмпіянат Рэспублікі Беларусь па настольным тэнісе, які праходзіў у сталіцы з 24 па 27 сакавіка, паведамляе прэс-служба БФНТ.
Чэмпіёнкай у жаночым адзіночным разрадзе стала Кацярына Баравок, якая пацвердзіла мінулагодняе званне. У фінале Баравок з лікам 4:2 перамагла Лізавету Цімашкову, трэцяе месца заняла Вера Волкава.
"Кожны раз, выходзячы да стала, старалася не думаць аб поспеху, проста гуляла з задавальненнем. У гэтым годзе перамога далася цяжэй, чым у мінулым: усё ж такі многія чакаюць ад чэмпіёна высокага выніку, што дадае груз адказнасці, - адзначыла Кацярына Баравок. - Не сказала б, што які-небудзь з выйграных матчаў прайшоў лёгка. На кожную саперніцу я настройвалася сур'ёзна, не лічачы нікога слабейшым за сябе. Усе дзяўчаты аказвалі неверагоднае супраціўленне: у беларускага настольнага тэніса добрае маладое пакаленне".
У фінале мужчынскага турніру сышліся Уладзіслаў Рукляцоў і Аляксандр Ханін. Лёс чэмпіёнства вырашаўся ў сёмым сэце, дзе мацнейшым быў Рукляцоў, які таксама абараніў тытул, здабыты год таму. Бронзавым прызёрам спаборніцтваў стаў Андрэй Цярохін.
"Я настройваўся на кожнага саперніка па-рознаму, аналізаваў іх стыль гульні. Зразумела, не ўсё атрымлівалася, асабліва ў фінале дапусціў шмат памылак, гуляючы справа. Гэты матч з Аляксандрам Ханіным быў цяжкім, мы абодва змагаліся з усіх сіл, але ў канцы сёмага сэта ўдача была на маім баку", - расказаў чэмпіён Беларусі.
У жаночым парным разрадзе чэмпіёнкамі краіны сталі Ульяна Мяшчанская і Таццяна Чакавая, у турніры мужчынскім дуэтаў перамаглі Аляксандр Ханін і Уладзіслаў Рукляцоў.-0-
