24 верасня, Мінск /Кар. БЕЛТА/. На чэмпіянаце Еўропы па валейболе сярод мужчынскіх каманд вызначылася першая паўфінальная пара, якую склалі зборныя Польшчы і Славеніі, паведамляе карэспандэнт БЕЛТА.
У Апелдорне сустракаліся каманды Польшчы і Германіі. Здавалася, што з самага пачатку палякі змаглі навязаць сапернікам выгадны для іх тэмп гульні. Аднак у першым сэце немцы змаглі павесці - 12:10. Пасля памылак чэмпіёны свету пачалі нервавацца, але сітуацыю, як і належыць, супакоіў іх капітан Міхал Кубяк, які зарабіў тры ачкі.
Далей усё пайшло пад дыктоўку палякаў, якім відавочна прыйшоўся да кампаніі Вільфрэда Леон. Ён выдатна дзейнічаў у нападзенні, перамагаючы блок сапернікаў практычна ў любых сітуацыях. Трэнер немцаў Андрэа Джані спрабаваў з дапамогай замен змяніць ход паядынку, аднак беспаспяхова. Польская зборная, перамогшы з лікам 3:0 (25:19, 25:21, 25:18), прадоўжыла да шасці матчаў серыю выйгрышаў у трох партыях на гэтым турніры.
Другі чвэрцьфінальны матч паміж славенцамі і расіянамі прайшоў у куды больш цікавай барацьбе і завяршыўся сенсацыйнай перамогай адных з арганізатараў чэмпіянату Еўропы з лікам 3:1 (25:23, 25:22, 21:25, 25:21).
Славенцы прадэманстравалі свой настрой, выкарыстоўваючы памылкі сапернікаў, якіх расійскія валейбалісты дапусцілі 38 за матч. Акрамя таго, балканская дружына была лепшая на падачы (11:8). Тут не было роўных Міцю Гаспарыні, які запісаў на свой рахунак 5 эйсаў. Ветэран славенскай зборнай стаў нараўне з Цінэ Урнаўтам і Клеменам Чэбулем адным з самых актыўных ігракоў сваёй каманды.
Дзеля справядлівасці варта адзначыць адсутнасць у расіян ключавых ігакоў. Ільяс Куркаеў атрымаў траўму ў гульні з Фінляндыяй і адправіўся дадому. Максім Міхайлаў з'яўляўся на пляцоўцы эпізадычна, а пасля другога сэта пакінуў пляцоўку Дзмітрый Мусэрскі. Без іх у Віктара Палятаева, Дзмітрыя Волкава і выхаванца беларускай школы валейбола Ягора Клюкі мала што атрымлівалася, хоць трэці сэт і застаўся за расійскай камандай.
Зборная Расіі рассталася з магчымасцю абараніць свой тытул, які каманда заваявала два гады таму пад кіраўніцтвам Сяргея Шляпнікава. Яго паслядоўнік, фінскі спецыяліст Туомас Самельвуа выйграў з расіянамі Лігу Нацый і выканаў кваліфікацыйны нарматыў на Гульні-2020, аднак не змог прывесці сваю каманду ў лік прызёраў галоўнага старту сезона ў Еўропе.
Славенцы атрымалі шанц другі раз пасля 2015 года трапіць на п'едэстал чэмпіянату Еўропы. За права выйсці ў фінал яны згуляюць з моцнай польскай зборнай. У другім паўфінале сыдуцца пераможцы матчаў Сербія - Украіна і Францыя - Італія.-0-
