17 студзеня, Мінск /Кар. БЕЛТА/. На 28-м мужчынскім гандбольным чэмпіянаце свету вызначыліся склады дзвюх груп асноўнага этапу, паведамляе карэспандэнт БЕЛТА.
У групу І, якая будзе базіравацца ў польскім Кракаве, увайшлі зборныя Іспаніі (4 ачкі), Францыі (4), Славеніі (2), Чарнагорыі (2), Польшчы (0) і Ірана (0). У шведскім Гётэбаргу ў групе ІІ згуляюць гандбалісты Швецыі (4), Партугаліі (2), Ісландыі (2), Венгрыі (2), Бразіліі (2) і Каба-Вердэ (0).
Акрамя таго, за тур да заканчэння першай групавой стадыі пуцёўкі ў асноўны раўнд сусветнага першынства забяспечылі сабе чэмпіёны планеты датчане, а таксама каманды Германіі, Сербіі, Катара, Нарвегіі, Нідэрландаў, Егіпта і Харватыі. Астатнія ўдзельнікі асноўнага этапу ЧС-2023 стануць вядомы сёння вечарам пасля заключных сустрэч папярэдняга этапу. Бамбардзірскую гонку ўзначальвае ісландзец Б'яркі Мар Элісан, які закінуў 26 мячоў.
Гульні другога раўнда пройдуць з 18 па 23 студзеня, пасля чаго ў чвэрцьфінал выйдуць па дзве лепшыя зборныя з чатырох груп. Паядынкі за траплянне ў паўфінал адбудуцца 25 студзеня, сустрэчы за выхад у фінал пройдуць 27 студзеня, а 29 студзеня пераможцы паўфінальных матчаў правядуць вырашальны паядынак за чэмпіёнскі тытул, а прайграўшыя паспрачаюцца за бронзу.
У фінале папярэдняга чэмпіянату свету, які праходзіў у 2021 годзе ў Егіпце, зборная Даніі перамагла шведаў (26:24), а ў гульні за бронзавыя ўзнагароды іспанцы былі мацнейшыя за французаў (35:29). Зборная Беларусі заняла 17-е падагульняючае месца.-0-
